Janë zbardhur detaje të reja nga vajza që u gjet pa shenja jete mëngjesin e kësaj të mërkure poshtë urës së Dajlanit në Durrës.
Burime bëjnë me dije se viktima është 32-vjeçarja Luljeta Preza, banuese në Sukth të Durrësit, e cila dyshohet se punonte si punonjëse seksi me pagesë. Ajo është vrarë me thikë, teksa ka dyshime se me të është abuzuar dhe seksualisht.
“Si rezultat i veprimeve hetimore të kryera paraprakisht nga grupi i posaçëm i ngritur për zbardhjen e kësaj ngjarjeje dhe nga ekspertët e mjekësisë ligjore, si dhe nga këqyrja e trupit të pajetë të 32-vjeçares, dyshohet se kjo shtetase ka humbur jetën për shkak të dëmtimeve të marra në trup, nga një mjet prerës.” thuhet në njoftimin e Policisë.
Mësohet se në trupin e viktimës janë konstatuar shenja dhune, ndërsa ka plagë të rënda në gjoks dhe në bark të shkaktuar me thikë, për shkak të të cilave ka humbur jetën. Policia e Durrësit bën me dije se ka shoqëruar 17 persona, të cilët dyshohet se kanë dijeni për këtë ngjarje.
Luljeta Preza është arrestuar në vitin 2014 nën akuzën për veprën penale “ushtrim prostitucioni”, teksa mësohet se ajo edhe tani punonte si punonjëse seksi me pagesë. Zona ku është gjendur trupi i pajetë është një pikë shumë e përdorur nga gratë që ushtrojnë të njëjtin profesion. Ato punojnë në atë zonë prej 4 vitesh.
Luljeta Preza u gjet pa shenja jete rreth 10:35 të paradites, poshtë urës së Dajlanit, teksa ishte e zhveshur Dyshohet se me të është abuzuar seksualisht dhe më pas është vrarë.
Njoftimi:
“Në lidhje me një informacion të dhënë paraditën e sotme, se rreth orës 10:35, në lagjen nr.13, Durrës, poshtë urës së Dajlanit, ishte gjetur pa shenja jete, një shtetase, ju informojmë se:
Nga verifikimet e kryera u bë i mundur identifikimi i kësaj shtetaseje, konkretisht u gjet e pajetë shtetasja L. P., 32 vjeçe, banuese në Sukth, Durrës.
Si rezultat i veprimeve hetimore të kryera paraprakisht nga grupi i posaçëm i ngritur për zbardhjen e kësaj ngjarjeje dhe nga ekspertët e mjekësisë ligjore, si dhe nga këqyrja e trupit të pajetë të 32-vjeçares, dyshohet se kjo shtetase ka humbur jetën për shkak të dëmtimeve të marra në trup, nga një mjet prerës.
Deri më tani, në ambientet e Policisë së Durrësit, janë shoqëruar 17 shtetas të cilët dyshohet se kanë dijeni për këtë rast.
Grupi hetimor vijon hetimet e thelluara për të dokumentuar plotësisht rrethanat e këtij rasti, si dhe për të përcaktuar autorësinë e tij.” njofton policia
