Një ngjarje e pazakontë është regjistruar pasditen e kësaj të hëne në një pishinë në Shkodër, ku një fëmijë 10-vjeçar është bllokuar pasi i ngeci dora në tubin e pishinës.
Është dashur ndërhyrja e zjarrfikësve të qytetit, të cilët kanë arritur ta lirojnë të miturin pa asnjë dëmtim në krah duke e dërguar më pas në spital. Fëmija është larguar me barelë, teksa në dorë ka patur ende një pjesë të tubit.
Lajmin e ka bërë me dije kryebashkiaku i Shkodrës, Benet Beci, përmes një postimi në rrjetet sociale, ku ka falenderuar zjarrfikësit. Siç shihet nga fotot, zjarrfikësit i hedhin vaj gjelle tek tubi, për të tentuar t’ja nxjerrin dorën të miturit.
“Dua të falenderoj nga zemra ekipin e zjarrfikësve të bashkisë sonë dhe asaj të Vaut të Dejës! Dita e sotme nuk ka qenë e lehtë për punonjësit e zjarrfikëses. Pas angazhimeve në shuarjen e zjarreve në dy zona, pasditja i ka gjetur në një tjetër situatë të vështirë. Një djalë 10 vjeçar ka mbetur i bllokuar në një nga pishinat e një biznesi privat. Dora e tij ka mbetur e bllokuar në tubin fundor të pishinës, ku forcat e zjarrfikëses kanë ndërhyrë për të zbrazur në kohë pishinën, si dhe për të nxjerrë fëmijën pa dëmtuar krahun e tij. Falë punës e sacrificës së tyre, sot kanë arritur të fitojnë në emër të jetës! Faleminderit shumë, të gjithëve”, shkruan ai.
