Juventusi është përjashtuar nga kompeticionet europiane për edicionin e ri futbollistik.
Ky ka qenë vendimi i fundit që ka dalë nga UEFA gjatë ditës së sotme, e që lë bardhezinjtë jashtë Ligës së Konferencës ku kishin siguruar praninë pas penalizimit të dhënë nga Federata Italiane për çështjen e plusvalencave.
UEFA kishte hapur hetim prej 7 muajsh, duke shqyrtuar edhe ajo dokumentacionin për klubin italian i cili po gjykohej në Itali për shkeljet me bilancet financiare, si për praktikën e plusvalencave, ashtu edhe për atë të mosdeklarimit të pagave që janë dhënë në të zezë.
Komisioni disiplinor i UEFA-s, ka vendosur që Juventusi nuk duhet të luajë një sezon në Europë, si dhe të paguajë një gjobë prej 20 milionë eurosh që do të shlyhet pjesërisht tani dhe pjesërisht “me kusht” më vonë.
Në vend të bardhezinjve, në këtë kompeticion do të marrë pjesë Fiorentina, e cila ishte renditur një vend më poshtë në Serinë A.
Ndërkohë në lidhje me çështjen ka reaguar vetë klubi i Juventus ku në një deklaratë zyrtare thekson se nuk do ta apelojë vendimin e UEFAS duke pranuar fajësinë.
Kjo shihet si një lëvizje taktike e bardhezinjve, pasi në rast se dënimi do të shtyhej, Juventus do të rrezikonte të merrte pjesë në edicionin 2024/25 të Ligës së Kampioneve.
