Policia e Tiranë ka dhënë detaje në lidhje me shoqërimin në komisariat të 11 inspektorëve të Inspektoratit Kombëtar të Mbrojtjes së Territorit.
Autoritet bëjnë me dije se shoqërimi i tyre në komisariat ka ardhur pas denoncimit një subjekt privat se ditën e sotme i janë paraqitur në objektin e tij 11 inspektorë të IKMT-së, dhe vetëm 4 prej tyre kishin urdhër për kryerjen e inspektimit në terren.
Pas dëshmive për grupin hetimor, policia i ka proceduar penalisht 11 inspektorët e IKMT-së për veprën penale “Shpërdorimi i detyrës”.
Njoftimi:
Më datë 24.07.2023 është paraqitur pranë Sektorit për Hetimin e Krimit Ekonomik dhe Financiar në DVP Tiranë një subjekt privat dhe ka kallëzuar se ditën e sotme, në objektin e tij, janë paraqitur 11 inspektorë të IKMT-së, dhe vetëm 4 prej tyre kishin urdhër për kryerjen e inspektimit në terren.
Në ambientet e DVP Tiranë janë shoqëruar 11 shtetasit e mësipërm, të cilët pas deklarimeve përkatëse dhe komunikimit me Prokurorinë pranë Gjykatës së Shkallës së Parë të Juridiksionit të Përgjithshëm Tiranë, janë proceduar në gjëndje të lirë.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale, për veprën penale “Shpërdorimi i detyrës”.
