Policia ka dalë me njoftim zyrtar lidhur me ngjarjen që ndodhi një ditë më parë në Skrapar, ku humbi jetën shtetasi turk Osman Akçay.
Blutë bëjnë me dije se lidhur me ngjarjen është vënë në pranga shoferi i kamionit
“Specialistët për Hetimin e Krimeve të Komisariatit të Policisë Skrapar arrestuan në flagrancë për veprën penale “Shkelja e rregullave të mbrojtjes në punë”, shtetasin A. B., 45 vjeç, banues në Çorovodë, Skrapar, me detyrë shofer kamioni, pranë një firme të përpunimit të mermerit në fshatin Zaloshnje, Skrapar, pasi mbrëmjen e djeshme duke transportuar uji me një çisterno të cilën e kishte vendosur në karrocerinë e kamionit që drejtonte, çisterna ka rrëshqitur nga karroceria dhe ka përplasur shtetasin O.A., 60 vjeç, (shtetas turk), i cili ka ndërruar jetë”,– njofton policia.
Kujtojmë se ngjarja e rëndë ndodhi mbrëmjen e djeshme në një kantier të nxjerrjes së pllakave në Skrapar, ku ka humbur jetën turku Osman Akçay, 60 vjeç, i cili ishte duke punuar kur çisterna me ujë e njërit prej kamionëve të firmës është shkëputur gjatë ngjitjes së mjetit në zonë malore dhe e ka zënë poshtë.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Berat, për veprime të mëtejshme.
