Policia e Tiranës ka “goditur” një tjetër qendër masazhesh që funksiononte për ushtrimin e aktivitetit të prostitucionit.
Në kuadër të operacionit “Spa 19” është arrestuar shtetasja K. I., 24 vjeçe, si dhe ka nisur procedimi në gjendje të lirë për shtetaset A. K., 33 vjeçe, E. L., 33 vjeçe, dhe E. O., 30 vjeçe, të katërta punonjëse në një qendër masazhesh, të gjitha banuese në Tiranë. Blutë e kryeqytetit gjithashtu kanë shpallur në kërkim administratorin e qendrës së masazhit, shtetasin O. Rr., 36 vjeç, banues në Tiranë.
“Shtetasi O. Rr. administronte një qendër masazhesh, në Rrugën Bardhyl, në të cilën ishin të punësuara 24-vjeçarja e arrestuar dhe tre shtetaset e tjera. Përveç aktivitetit të regjistruar ligjërisht si qendër masazhesh, në këtë subjekt ushtrohej edhe aktiviteti i kundërligjshëm i prostitucionit.” thuhet në njoftimin e policisë.
Në cilësinë e provës materiale u sekuestruan 51 500 lekë të rinj dhe 150 euro, të dyshuara të përfituara nga kjo veprimtari e paligjshme, bashkë me 3 celularë.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale.
