Kontratat koncesionare të inceneratorëve po faktohen si ndër aferat më të mëdha korruptive të viteve të fundit. Ish-zëvendëskryeministri është në kërkim, ndërsa një ish-ministër, një deputetet dhe zyrtarë të tjerë janë pas hekurave. Lista me gjasë mund të shtohet.
Nga ana tjetër, kompanitë e Klodian Zotos dhe Mirel Mërtirit, bosët e inceneratorëve në kërkim, vijojnë të marrin pagesa nga buxheti i shtetit në mënyrë periodike. Qindra miliona euro kanë shkuar për projektin e piramidave të kohës së Edi Ramës dhe pagesat vijojnë.
Ky i fundit ndërkohë, nuk ka preferuar ta komentojnë këtë fakt në një konferencë që mbajti me gazetarët këtë pasdite.
Kreut të qeverisë iu kujtu arrestimi i ish-kryebashkiakëve socialistë të afërt me të, Vangjush Dako e Safet Gjici, dhuna barbare e familjarëve të Rahman Rrajës, si dhe kërkesa për arrest ndaj ish-bashkëpunëtorit të ngushtë – ish-zëvendëskryeministrit Arben Ahmetaj. Pyetja që iu bë në konferencë ishte nëse kishte ndryshuar qëndrim “se përgjegjësia është personale” – refreni që Rama përdor sa herë që njerëzit me të cilët ka qeverisur, kapen në afera. Po ashtu, u pyet nëse do anulohet kontratat e inceneratorëve, që ai i ka mbrojtur në vijimësi, pavarësisht dëmit me shifra kolosale në buxhetin e shtetit, siç konstatohet tashmë dhe nga KLSH e së fundmi edhe SPAK.
Për të dyja çështjet, Rama nuk u përgjigj.
“Për të gjitha këto pyetje duhet të klikoni në faqen time në FB dhe duhet ti referoheni”, tha Rama, duke pasur parasysh një deklarate të shpërndarë në faqen e tij në rrjetin social pasditen kur Parlamenti miratoi kërkesën e prokurorisë për arrestimin e Arben Ahmetajt.
Në atë komunikim, të zbardhur edhe në faqen e qeverisë, nuk ka asnjë koment lidhur me pagesat nga buxheti i shtetit që vijojnë të shkojnë në llogaritë e kompanive përfituese të incenratorëve.
Për më tepër, përmes një fjalimi të regjistruar e të luajtur më pas në kohën e lajmëruar më herët, Rama rreket ta shohë skandalin si një sukses të reformës në drejtësi.
Opozita nga ana tjetër dhe zëra të spikatur të opinionit publik, e shohin te Edi Rama bosin e vërtetë të inceneratorëve.
“Ndërmarrja është qeveritare, ishte e Edi Ramës. Mireli dhe Klodiani ishin të punësuar privatë në sipërmarrje dhe kjo nuk mund të jetë ndryshe”, tha Berisha në një konferencë për mediat javën e kaluar, duke paralajmëruar dhe nisje të protestave të aferës, që siç u shpreh, në një vend perëndimor do të rrëzonte një qeveri.
Kritike opozita ka qenë edhe me veprimet e SPAK, duke artikuluar se prokuroria nuk është treguar në lartësinë e duhur për të goditur ministra të tjerë që i cilëson të përfshirë në aferë, si Damian Gjinkuri, Belinda Balluku, Sekretarin e qeverisë Engjëll Agaçi, kryebashkiakun e Tiranës Erion Veliaj, si dhe vetë kreun e ekzekutivit, kryeministrin Edi Rama.
Një tjetër kritikë për prokurorinë, e bërë jo vetëm nga politika por edhe ekspertë të ligjit, janë lehtësimi i akuzave për të pandehurit, duke mos përfshirë veprën penale të grupit të strukturuar kriminal.
