Kënaqësinë e tij Edi Rama e ka shfaqur që në reagimin e parë pas dhunës së ushtruar në Kuvendin e Kosovës ndaj Albin Kurtit, por nuk është mjaftuar me kaq, ai ka inskenuar një fluks kritikash, që sipas tij, i janë bërë pse mori në mbrojtje homologun e tij.
“Më “mbytën” miq nga Kosova pse e paskam mbrojt Albinin, se shishen e parë e paska gjujt Bislimi dhe paska qenë VV që e paska hap kapitullin e dhunës në Kuvendin e Kosovës kur ishte në opozitë!”,- shkruan nder te tjera Rama.
Dhe nëpërmjet kësaj sajese ka sajuar edhe sulmin e dyte brenda pak orësh ndaj Kurtit duke thënë se qasja e kryeministrit të Kosovës ndaj botës është e gabuar dhe reputacioni i Kosovës në sytë e ndërkombëtarëve ka rënë.
Pasi Kurti nuk e priti në Prishtinë, nuk e përfilli për Open Balkan më herët, nuk e mori në konsideratë fare draftin e tij dërguar Macronit dhe Scholz, Rama ka ndërmarrë një sulm frontal ndaj tij dhe Kosovës.
Reagimi i plotë nga Edi Rama:
“Më “mbytën” miq nga Kosova pse e paskam mbrojt Albinin, se shishen e parë e paska gjujt Bislimi dhe paska qenë VV që e paska hap kapitullin e dhunës në Kuvendin e Kosovës kur ishte në opozitë! Nuk më duhet kush e ka gjujt shishen e parë, mbase keni të drejtë ju, mbase jo, por nëse demokracia parlamentare katandiset në kush gjujti i pari atëherë kemi një problem edhe me kuptimin e demokracisë, edhe me kuptimin e këtij momenti kyç për Kosovën, e cila nuk ia ka borxh askujt besoj shfaqjen skandaloze të ditës së sotme. Dhe si dikush që e di mirë se sa poshtë ka rënë Kosova në sytë e krejt botës demokratike për shkak të qasjes së gabuar të qeverisë së saj, unë vazhdoj mendoj se çka ndodhi sot është e turpshme dhe jam i bindur se justifikimi i asaj shëmtie nuk e ndihmon, po e dëmton ende më shumë reputacionin e Kosovës, prandaj thashë dhe e them prapë se uroj që opozita të distancohet nga një shëmti e tillë!”, shkruan Rama.
