Një gjeneral i lartë rus është vrarë në një sulm me raketa në Ukrainë. Burimet ruse thanë se gjenerali Oleg Tsokov ka vdekur në një sulm në një hotel ku strehohen komandantët ushtarakë rusë në Berdyansk, në bregdetin jugor të Ukrainës.
Tsokov ishte zëvendës komandant i qarkut ushtarak jugor të Rusisë Ministria ruse e mbrojtjes nuk e ka konfirmuar zyrtarisht vdekjen e tij, por u njoftua nga kanalet ruse të luftës në “Telegram”.
Prezantuesja televizive Olga Skabeyeva tha se të gjitha mediat po e raportonin. Skabeyeva e cila prezanton një talk show në kanalin shtetëror “Rossiya-1” tha se ai u vra nga një raketë “Storm Shadow” e furnizuar nga Britania e Madhe.
Deputeti dhe gjenerali rus në pension, Andrei Gurulyov tha në emisionin e saj “60 Minutes” të martën, se gjenerali ishte kthyer në Ukrainë pavarësisht se ishte plagosur rëndë më herët në konflikt.
Ai u godit shtatorin e kaluar, ndërsa komandonte Divizionin 144 të Këmbësorisë së Rusisë në zonën Svatove të Ukrainës lindore të pushtuar nga forcat ruse.
“Për fat të keq, ai vdiq heroikisht. Ky njeri meriton respekt të madh,” tha Gurulyov. Disa kanale ruse në Telegram raportuan gjithashtu vdekjen e tij, duke përfshirë blogerin “WarGonzo”dhe një kanal me më shumë se gjysmë milionë ndjekës “Military Informant” Ende nuk ka një informacion zyrtar nga Moska, shkruan BBC.
