Nga Boldnews.al
Familja Rraja në Fushë-Krujë ka gjithçka që i duhet një grupi njerëzish për të sfiduar hapur Shtetin.
“Familja” ka pushtet, me përfaqësues të tyre kryesor Rrahman Rrajën, deputetin socialist me disa mandate në Parlamentin Shqiptar.
“Familja” ka eksponentë të rëndësishëm kriminal: Redian Rraja dhe Ramazan Rraja akuzohen për vepra shumë të rënda penale, që nga atentati ndaj ish-prokurorit të Durrësit, Arjan Ndoja e deri tek trafiku i narkotikëve në vendet e Bashkimit Europian.
“Familja” ka eksponentë “shumë të fortë”, si ky grupi prej 8 personash, të cilët me shkopinj e armë në brez, dhunuan barbarisht dy kushërinj pak ditë më parë, vetëm e vetëm përse të dëmtuarit guxuan t’i kallëzonin në Polici për zhurmën që bënte gurorja e Rrajave.
“Familja” kontrollon policinë, e cila, duke filluar nga Komisariati i Krujës e deri në Drejtorinë e Përgjithshme të Policisë, nuk guxuan për shumë orë që të kërkonin e ndalonin agresorët e dy kushërinjve Maja.
Dhe, natyrisht, “Familja Rraja” ka biznese, ka shumë biznese, pjesa më e madhe të ngritura apo të lulëzuara në kohën e “Rilindjes” së Edi Ramës dhe Rrahman Rrajës.
Bizneset “Rraja”
– Flamur Rraja është vëllai i deputetit Rrahman Rraja.
Flamuri ka në pronësi “Sara Autogrill”, pranë ish-Fabrikës së Tjegullave. Biznesi është regjistruar në vitin 2008 dhe ka objekt të veprimtarisë së saj “Tregtim me pakicë i karburanteve, gazit, etj, Servis makinash. Hotel. Grumbullim dhe tregtim të frutave e perimeve në kushte frigoriferike”.
Xhelal Rraja rezulton se ka në pronësi edhe një “Person Fizik”, me emrin e tij dhe që ka aktivitet “Hotel, bar-restorant. Ambalazhim valixhe për udhëtarë”, me adresë afër aeroportit Rinas.
Në emër të Xhelal Rraja rezultojnë edhe dy biznese me statusin “Pezulluar”. Konkretisht “Vila Aeroport” dhe “Rraja”, njëra për shërbime bar-hoteleri dhe tjetra për tregtim mallrash të ndryshme.
– Ramazan Rraja, djali i Xhelal Rraja ka në pronësi kompaninë “Rraja -2013”, me objekt të aktivitetit të saj “Importimi dhe tregtimi me shumicë e pakicë i produkteve të industrisë kimike për mbrojtjen e drurëve, stazhionimin e lëndës drusore, mbrojtjen e gjysëm-produkteve drusore dhe produkteve përfundimtare të drurit etj…”.
Ramazan Rraja aktualisht është i arrestuar, nën dyshimet se ka qenë i përfshirë në atentatin ndaj prokurorit të Durrësit, Arjan Ndoja. Biznesi është me statusin “Pezulluar”.
– Rexhep Rraja, djali i deputetit Rrahman Rraja, rezulton bashkëpronar me 50 përqind të aksioneve në kompaninë “Digitel”. Kompania është krijuar në vitin 2020 dhe ka objekt të veprimtarisë së saj “Rrjete dhe shërbime të komunikimeve elektronike, Shërbime audio dhe audiovizive (Televizion Kabllorë), Montime sistemesh sigurie, sistemeve të akses kontrollit, sisteme aparaturash mjekësore, etj”.
Biznesi ka adresë në Nikël të Krujës dhe prej vitit 2021 është me statusin “Pezulluar”.
– Redjan Rraja, nip i deputetit Rrahman Rraja, aktualisht po përballet me drejtësinë, i akuzuar si pjesëmarrës në atentatin kundër prokurorit të Durrësit, Arjan Ndoja.
Redjani ose “Dentisti”, ka aktiv një biznes “Person fizik”, me aktivitet Klinikë Dentare.
– Përparim Rraja, pjesë e familjes “Rraja”, gurorja e të cilit u bë shkak për dhunën ndaj kushërinjve Maja, ka në pronësi kompaninë “Doku P”. Objekti i kësaj kompanie është “Prodhim inertesh dhe transport ndërkombëtar”.
– Ineidi Rraja, djali i Përparim Rrajës, i arrestuar së fundmi për dhunën ndaj dy kushërinjve Maja, ka në pronësi shoqërinë private “Rraja Ndërtim”.
– Shpëtim Rraja është babai i Andi Rraja, i arrestuar gjithashtu për dhunën ndaj dy kushërinjve Maja. Shpëtimi ka në pronësi kompaninë “Erandi”, e cila ka objekt të veprimtarisë së saj “shitblerje artikuj të ndryshëm me shumicë dhe pakicë, artikuj industrial, lubrifikantë, ndërtimi, ushqimore, prodhim dhe tregtim artikuj druri, konstruksion metalik, shërbime të ndryshme, import-eksport, servis dhe lavazh. Transport mallrash dhe pasagjerësh, tregti karburanti me pakicë, tregti gazi i lëngshëm me pakicë, bar restorant-hotel”.
– Ervis Rraja, djali i Shpëtim Rrajës dhe vëllai i Andi Rrajës, ka në pronësi një “Person fizik” me emrin e tij, i cili ka objekt të veprimtarisë ekonomike “Tregti pjesë këmbimi dhe aksesorë automjetesh me pakicë, të reja dhe të perdorura. Servis auto. Punime mekanike. Import mallra industriale & pjesë këmbimi automjete. Shitje-Blerje & dhënie me qera automjete”.
Emrat sa më sipër janë persona që kanë lidhje të afërt familjare me deputetin Rrahman Rraja. Një tjetër numër i konsiderueshëm personash me mbiemër “Rraja” dhe që janë banorë e rezidentë të zonave të Fushë Krujës dhe Niklës rezultojnë pronarë në kompani të ndryshme private.
