Nga Boldnews.al
Në darkë vonë, brenda hollit të një hoteli në New York në vitin 2019, para një shisheje të madhe vere të fortë, Edi Rama, Aleksandër Vuçiç dhe Zoran Zaev, vendosën të bëhen “lidera të mëdhenj”, duke shpikur idenë e “Minichengenit Ballkanik”, që më vonë u quajt “Ballkani i Hapur”. Pikërisht në kohën kur Procesi i Berlinit po merrte formë, Rama shpiku idenë e një “grupimi ballkanik”, pa pasur mbi kokë monitorimin e BE-së, kryesisht të Gjermanisë dhe Francës të cilët u investuan për Procesin e Berlinit.
Ndërsa dehja duket se kapi më parë Ramën, Vuçiç do ketë qenë fort i kthjellët që i erdhi një zog në kafaz, për ta shfrytëzuar në këngën e tij patriotiko-shoviniste dhe njëkohësisht të rriste shkëmbimin tregtar duke mbytur me mallrat serbe tregun shqiptar. Këtë i ofroi nisma e Ramës që e shëtiste kudo që shkonte. Pa u konsultuar me drejtuesit e qeverisë së Kosovës, Malit të Zi dhe Bosje Hercegovinës, Rama, Vuçiç, Zaev ndërmorën nismën që deri dje ishte në fuqi dhe ndoshta edhe mund të vijojë, pavarësisht se dikujt në Shqipëri i doli “pija” pas katër vitesh…
Shqipëria, Maqedonia e Veriut dhe Serbia nënshkruan disa marrëveshje në këtë nismë e cila vërtetë kishte emrin e madh “Ballkani i Hapur, por linte jashtë saj gjysmën e vendeve të tjera. Serbia ia pa hairin duke shumuar shkëmbimin tregtar me lehtësinë e madhe të taksave doganore dhe për më shumë ideja e vjetër për të pasur një “dalje në detin Adriatik”, që ka bërë një det me gjak shqiptarësh, ia ofroi “vera e kuqe” e Ramës tonë.
I ndodhur ngushtë, duke kuptuar se dështimi ishte katastrofik me “Ballkanin e Hapur”, dhe mbi të gjitha pas refuzimit të Vuçiçit që Rama të bëhej kumbar i lirimit të tre policëve kosovarë të rrëmbyer nga forcat serbe, kryeministri ynë u hakërrye duke mbyllur “Ballkanin e Hapur”, por pasi katër vite mbeti peng i saj, duke sjellë dëm ekonomik dhe mbi të gjitha politik me Kosovën. Në dhjetë vite qeverisje të Ramës marrëdhëniet zyrtare mes Shqipërisë dhe Kosovës nuk kanë qenë kurrë më të zeza. Nuk është vetëm Kurti i keq për Ramën, por i tillë ishte edhe Haradinaj, po ashtu edhe Isa Mustafa… Kur Vuçiç as i hodhi sytë Ramës dhe Prishtina zyrtare as e qasi më, Rama si i llastuar hakërrehet pas katër vitesh se unë e mbyll “Ballkanin e Hapur”.
Vetëm si ide është mbyllur pasi marrëveshjet tregtare, të lëvizjes së lirë dhe njohjes së fletushkave të diplomave janë ende në fuqi dhe nuk zhbëhen, paçka se kryeministri ynë po na shet një produkt të skaduar në tentativë për të mbushur mendjen se “Ballkani i Hapur” u mbyll me “forcën” e tij.
Kryeministri Edi Rama, të paktën publikisht vendosi të mos e vijojë më tej këtë nismë, duke theksuar se tashmë jemi pjesë e “Procesit të Berlinit”, pikërisht në këtë nismë të ish-kancelares gjermane Angela Merkel që përfshinte të gjashtë vendet e Ballkanit Perëndimor dhe jo një “gjsmëgjel” si ai i Ballkanit të Hapur, me një personash që katundin tonë e quante veten “gjel i madh”, pa e kuptuar se para Serbisë ishte një zogëz naive që mbarsej në kotecin e kontrolluar nga Vuçiç.
Ironike është fakti se nisi me një gotë verë përpara në SHBA, ku asokohe Rama mendohet se ka takuar edhe McGonigalin e skandalit dhe u mbyll po me ca verë të pirë lumë. Takimi i fundit i Ballkanit të Hapur daton pikërisht me panairin e verës në Serbi, ku Vuçiç i deh bejagi nga gëzimi, ndërsa Rama sa i merrte erë një pijeje që e kishte trullosur për katër vite pa e ditur se çfarë i bënë në “kotecin e Vuçiçit”.
