Deputetja britanike Alicia Kearns, ka komentuar këtë të Martë situatën në veri të Kosovës.
Në deklaratën e saj, Kearns e ka cilësuar situatën kritike, teksa ka ngritur alarmin se në kishat ortodokse në veri të Kosovës po kontrabandohen armë nga Serbia përmes ambulancave. Ajo theksoi se lidhur me këtë kontrabandim, KFOR-i britanik është në dijeni.
“KFOR është i vetëdijshëm, se ka armatim që kontrabandohet nga kufiri prej Serbisë në kishat ortodokse me ambulanca. Kur trupat tanë janë në dijeni për këtë dhe përpiqen të marrin leje dhe t’i kapin, leja zgjatet shumë. Deri në momentin që të sigurohet leja, ‘befasishëm’ një ambulancë u paraqit në kishë dhe nxori përsëri të gjitha armët”, tha Kearns.
Kearns gjithashtu u shpreh e shqetësuar edhe për armatimet që Britania i shet Serbisë, dhe kërkoi që të frenohen të gjitha eksportet me këtë shtet.
“Jam shumë e shqetësuar për faktin se ne po i shesim municione të vogla Serbisë. Duke qenë se policia atje ka kryer sulme dhe ka rrëmbyer tre policë kosovarë, si e dimë ne se asgjë që i kemi shitur Serbisë nuk përdoret në atë kontekst? Unë kërkoj që të vihen frena dore në të gjitha eksportet drejt Serbisë”, tha Kearns.
