Ka ndërruar jetë sot në moshën 81-vjeçare, ish-presidenti i Serbisë Milan Milutinoviç. Lajmin për ndarjen e tij nga jeta e ka bërë me dije ministri i Punëve të Jashtme të Serbisë dhe zv.kryeministri Ivica Daçiç.
Përmes një postimi në rrjetet sociale, Daçiç i ka shprehur ngushëllime familjarëve dhe miqve të ish-presidentit si dhe ka theksuar se Milutinoviç ishte një person i cili i ka shërbyer vendit në periudhën më të vështirë të Serbisë.
“Ai ka kryer funksionet më të rëndësishme në periudhën më të vështirë të historisë së Serbisë. Ngushëllimet e mia më të thella për familjen dhe miqtë e tij”, ka shkruar Daçiç në postimin e tij.
Milutinoviç mbajti detyrën si president i shtetit të atëhershëm themelues të Serbisë brenda Republikës Federale të Jugosllavisë nga viti 1997 deri në vitin 2002. Ai konsiderohej bashkëpunëtor i ngushtë i presidentit jugosllav Slobodan Millosheviç, i cili u padit për krime lufte.
Milutinoviç u padit gjithashtu nga Gjykata Penale Ndërkombëtare e OKB-së në Hagë në vitin 1999. Në vitin 2003, Milutinoviç u dorëzua në gjykatë dhe u lirua nga të gjitha akuzat në vitin 2009.
Kush ishte Milan Milutinovic?
Ai lindi në Beograd më 19 dhjetor 1942. Rrjedh nga një familje e vjetër beogradase. Shkollën fillore dhe të mesmen e kreu në Beograd, ndërsa në vitin 1965 u diplomua në Fakultetin Juridik. Në moshën 20-vjeçare ka qenë anëtar i kryesisë së Shoqatës së Rinisë Socialiste, përgjegjës për marrëdhëniet ndërkombëtare.
Më vonë u bë anëtar i këshillit politiko-shoqëror të Kuvendit Federal dhe njëkohësisht kryetar i Komitetit Komunal të Bashkimit të Komunistëve të Vraçarit dhe anëtar i Komitetit të Qytetit të SK Beogradit.
Kjo u pasua nga posti i Sekretarit të Republikës për Arsimin dhe Shkencën. Më pas u emërua drejtor i Bibliotekës Kombëtare të Serbisë nga viti 1983 deri në vitin 1989.
