Presidenti i 42-të i SHBA-ve Bill Clinton do të vizitojë nesër Shqipërinë në një qëndrim 24 orësh në vendin tonë, teksa janë zbardhur dhe disa nga pikat e axhendës së vizitës zyrtare.
Kjo vizitë e parë e presidentit të 42-të të Shteteve të Bashkuara të Amerikës në Shqipëri, do të jetë dy ditore, në datat 3 dhe 4 korrik 2023.
Clinton dhe delegacioni që e shoqëron do të mbërrijë në Tiranë ditën e hënë, më 3 korrik, pasdite, ku në orën 19:00 do të pritet nga Kryeministri Edi Rama në një ceremoni të posaçme zyrtare në Bulevardin “Dëshmorët e Kombit” përballë Kryeministrisë, me pjesëmarrjen edhe të qytetarëve.
Pas ekzekutimit të himneve kombëtare të SHBA-ve dhe Shqipërisë, Kryeministri Edi Rama dhe ish-presidenti amerikan Bill Clinton do të bëjnë parakalimin ceremonial dhe do të nderojnë flamujt e dy vendeve.
Në orën 19:05 Kryeministri Edi Rama do të mbajë fjalën e rastit dhe më pas do të ftojë zotin Bill Clinton të marrë çmimin e akorduar. Në orën 19:25 do të zhvillohet ceremonia e nderimit të Presidentit të 42 të SHBA-ve Bill Klinton me “Yllin e Mirënjohjes për Arritjet Publike” që do të pasohet nga fjalimi i ish-presidentit amerikan.
Kujtojmë se pak ditë më parë, kryeministri Edi Rama deklaroi se e ka ftuar presidentin Clinton prej disa kohësh, por e ka mbajtur sekret për shkak të ndonjë të papriture në axhendën e tij.
“Kjo është një vizitë e parashikuar dhe planifikuar prej disa kohësh të cilën e kemi mbajtur sekret vetëm për arsye të ndonjë befasie që mund të kishte axhenda e tij. Është një takim për të bërë të mundur prezantimin me Shqipërinë të presidentit Clinton. Ai ka qenë në Kosovë, ai njeh Kosovën por ai nuk ka qenë asnjëherë në Shqipëri ndërkohë që për shqiptarët ai dhe familja e tij kanë një respekt dhe një ndjenjë afeksioni të jashtëzakonshme”, tha Rama.
Bill Clinton gjatë kohës së mandatit të tij si president i shtetit më të fuqishëm në botë ndikoi në miratimin dhe realizimin e vendimeve të OKB-s për ndërhyrjen e NATO-s në Luftën e Kosovës në vitin 1999.
