“Qetësia”, term i fundit që mund të mendohet në këtë pikë te përfaqësuesja e Gjermanisë pas disa vitesh të trazuara, aty ku dështimet kanë marrë nuancën e “së zakonshmes”, ndryshe nga sa jemi mësuar t’i shikojmë “pancerat” në periudhat më të arta.
Hansi Flik erdhi në petkun e “bundëstrajnerit” (term i cili i referohet Hansi Flikut sipas analistëve gjermanë, pra trajner mjeshtër), pasi suksesi me Bajernin në sezonin 2019-2020 dha indikacionet e duhura se hegjemonia e 58-vjeçarit do të shtrihej edhe te përfaqësuesja. Hansi ka gati dy vjet në krye të “pancerave” dhe situata ka filluar t’i rrëshqasë nga duart, aq sa po mendohet edhe shkarkimi nga Federata Gjermane e Futbollit.
Pikërisht testet e muajt qershor i kanë rënduar mjaft pozitat e Flikut te kampionët e 4-fishtë në spektrin e Botërorëve, 2 humbje dhe 1 barazim, krahas rivalëve në nivel mesatare, konkretisht përballë Ukrainës, Polonisë dhe Kolumbisë, ndonëse në kuadrin e testeve miqësore, pasi ata e kanë siguruar biletën drejt “Euro 2024” në rolin e organizatorëve.
“FINALET E SHTATORIT”- Prestigjiozja gjermane “Bild” ka raportuar nga burimet kofidenciale brenda përfaqësueses se bordi i ka lënë afat final së ardhmes së Flikut në miqësoret e muajit shtator. 58- vjeçari ia hodhi paq në sajë të trendit negativ me justifikimin se u ndikua nga periudha eksperimentale në planin taktik.
Federata e ka etiketuar Julian Nagelsmanin si alternativën kryesore, nëse Hansi nuk ia del të bindë karshi Japonisë dhe Francës. 35-vjeçari është i vetëm emër që përmbush kriterin për të marrë “timonin” e Gjermanisë, pasi ai ka punuar me kontingjentin dërrmues, pra lojtarët e Bajernit.
Po ashtu, gjetja e balancave në Mynih pas largimit të Levandovskit dhe improvizimi e “aktorëve” të ndryshëm si “pykë” ka shërbyer si provë bindëse për t’ia dorëzuar “çelësat” ish-teknikut të kampionëve në periudhën 2021-2023.
PROBLEMI-Julian ka qenë në kontakte me tri klube pas shkarkimit rrufe nga rekordmenët, duke nisur me Totenhemin, Çelsin, e së fundmi PSG-ja. Ai ende është në kërkim të ekipit të duhur për t’i drejtuar në sezonin e ri dhe nëse i prezantohet një ofertë tunduese është i gatshëm të firmosë, pasi përfaqësuesit e kombëtares nuk mund t’i japin siguri, e cila varet prej ecurisë së Flikut në “betejat” e shtatorit.
STATISTIKAT-Të dhënat përbëjnë një nga elementët kryesorë në peshimin e kontributit të dy personazheve nga fusha e trajningut. Nëse i referohemi sezonit 2022-2023, rezulton se 17 takime në “timonin” e kombëtares Hansi numëron 5 humbje, 6 barazime dhe 6 fitore.
Ndërsa Nagelsmani në krye të Bajernit, po në të njëjtën periudhë, numëron 37 ndeshje, e përkthyer me 27 fitore, 3 barazime dhe vetëm 3 humbje.
