Nga e hëna e 3 korrikut, shërbimet e Kadastrës do të jepen online përmes E-Albanias. Ndryshimet, sipas kryeministrit, vijnë për të shmangur korrupsionin.
“Ditën e hënë, në datë 3 korrik, Kadastra nuk është më e aksesueshme për publikun. Askush nuk ju nuk mund të bëjë asgjë në Kadastrës. Sepse askush brenda në Kadastër nuk do të mundet të përgjigjet. Asnjë nga kushërinjtë dhe miqtë që keni futur në Kadastër. Sepse nuk do të ketë gjë në dorë. Do të jetë një makineri digjitale”, tha Rama gjatë një aktiviteti këtë të premte, duke premtuar zhdukjen e korrupsionit në këtë institucion plot 1 dekadë pasi erdhi në krye të qeverisë.
Ai deklaroi se influenca e deputetëve dhe kryebashkiakëve ka qenë e pranishme dhe se udhëheqja e PS ka dhënë shembullin e shëmtuar për të gjithë të tjerët.
“Kemi parë të ndodhin çudira pas çudirash me pronat e shqiptarëve. Aktori kryesor i kësaj historie të zymtë është korrupsioni, paraja por ajo shprehja kur gjenerali shkul një mollë, ushtarët marrin të gjithë pemët ka bërë që për shkak se influenca politike e deputetëve, e kryebashkiakëve dhe të tjerëve me radhë ka qenë shumë e pranishme atëherë të tjerët kanë bërë 1 mijë fishin e asaj që kanë qenë të detyruar nga lidhjet miqësore, familjare, klanore. Dhe unë dua ta them me gojën plotë dhe kokën ulur se sot është dita për t’i kërkuar një ndjesë shumë të madhe në emër të PS të gjithë atyre shqiptarëve që kanë kaluar në zinxhirin e torturave në kadastër. Kjo është ndjesa e kryetarit të një partie fajtore. Nuk është e gjithë partia por udhëheqja që ka dhënë shembullin më të shëmtuar për të gjithë të tjerët, që u ka thënë të tjerëve se kjo bankë është një han me 7 porta ku nga porta kryesore futen udhëheqësit. Kadastra është institucioni i vetëm në Shqipëri që bashkëjeton me kërcënimet. Kjo ndjesë sot është një ndjesë që mezi kam pritur të vijë dita ta bëj por nuk e kam bërë më parë se e kam ditur që e nesërmja do vazhdojë te jetë njësoj. Mezi kam pritur që të vijë dita që të them”, deklaroi Rama.
Ai u shpreh se pret dorëheqje masive nga ky institucion, ndërsa shtoi se pagat do të rriten në shifra të konsiderueshme. Rama bëri thirrje që profesionistët e fushave që kërkohen nga institucioni të aplikojnë në vendet e punës që janë të lira.
Ndërkohë, drejtoresha e Agjencisë Shtetërore të Kadastrës, Dallëndyshe Bici deklaroi se regjistrimi i pronës dhe legalizimi i saj do t’i nënshtrohet një reforme të thellë, ku do të jenë sistemet e automatizuara që do t’i japin përgjigje qytetarit dhe jo zyrtarët.
Nga ana tjetër, kryetari i PD-së Sali Berisha i cilëson ndryshimet “një hap tjetër de fakto drejt shtetërimit të tokave”.
“Hap tjetër, pasi ka vendos në një regjim pothuaj shtetërimi, jo të hapur po të fshehtë me korporatën e investimeve strategjike, që është yndyra e tokës shqiptare ajo, brigjet janë, pjesa nga Velipoja në Kepin e Stillës, të cilat shteti sipas ligjit që ka bërë mund t’i marrë kur të dojë, si t’i dojë dhe mund t’ia japë kujt të dojë“, tha ai në një konferencë për mediat këtë të premte.
