Nga Boldnews.al
Këtë fundjavë, nga fusha e plehrave në periferi të Vlorës, po lëshohen shtëllunga zjarri dhe tymi të zi, i cili po përhapet me shpejtësi në të gjithë qytetin.
Kjo situatë përsëritet shpesh kohët e fundit, ndërkohë që administrata lokale duket e pafuqishme për të përballuar lëndët toksike që pushtojnë ajrin nga djegia pa kriter e mbeturinave të qytetit.
Prej më shumë se tre vitesh, banorët e Vlorës presin ndërtimin e landfillit të ri, i cili, siç thuhet, do t’i japë zgjidhje të përhershme problemit të depozitimit dhe përpunimit të mbeturinave.
Por, projekti 10 milionë dollarë, i cili iu la në dorë biznesmenit tashmë në kërkim, Klodian Zoto, është ende shumë larg përfundimit, megjithëse duhet të ishte bërë gati në vitin 2021.
Në qershor të vitit 2020, një tender për ndërtimin e landfillit të ri të Vlorës, i zhvilluar në errësirë të plotë, shpalli fitues bashkimin e operatorëve “Integrated Technology Service” dhe “Bulfaro” srl.
Vlera e tenderit ishte 10 milionë dollarë dhe fondi u sigurua nga një grant i bankës gjermane, KFW.
Për zhvillimin e këtij tenderi nuk pati asnjë grimë transparence dhe të dhënat sipërfaqësore për të u mësuan vetëm nga një publik në faqen zyrtare të internetit të Bankës Gjermane.
Tender në errësirë
Në vitin 2017, Parlamenti Shqiptar miratoi ligjin për marrjen e një huaje nga Banka Gjermane për Zhvillim, me vlerë 10 milionë euro, për ndërtimin e landfillit të Vlorës.
Tre vjet më pas, në një procedurë tërësisht jo-transparente, u mësua se tenderin e kishte fituar bashkimi i operatorëve, ku rolin kryesor e kishte “ITS” e Klodian Zotos.
Kompania e tij shfaqet edhe në kontratat koncesionare për ndërtimin e tre impianteve të përpunimit të mbetjeve në Elbasan, Fier dhe Tiranë.
“Boldnews.al” u përpoq për disa muaj të mësonte se cili ishte autoriteti që kishte zhvilluar tenderin, cilët ishin operatorët ekonomikë pjesëmarrës dhe sa ishte vlera e propozuar nga fituesi “ITS & Bulfaro”.
Disa kërkesa për informacion iu dërguan paralelisht Agjencisë Kombëtare të Ujësjellës-Kanalizimeve dhe Mbetjeve Urbane (AKUM), Ministrisë së Infrastrukturës dhe Bashkisë së Vlorës.
Të tre institucionet nuk dhanë asnjë përgjigje, duke e kaluar topin e përgjegjësisë tek njëra-tjetra. Edhe pas investimit t Komisionerit për të Drejtën e Informimit, nuk u arrit të hidhej dritë mbi detajet më elementare të kontratës dhe mënyrës se si u shpall fituesit.
Madje, përfaqësues të këtyre institucioneve, këmbëngulnin që informacionin për tenderin ta merrnin pranë bankës gjermane, KFW, e cila, si çdo bankë, vetëm financon dhe nuk zhvillon projekte.
Fituesi në kërkim
Kontrata për ndërtimin e landfillit të Vlorës parashikonte që vepra publike të përfundonte në një afat 1-vjeçar.
Megjithatë, deri në fund të vitit 2021, landfilli i Vlorës ishte shumë larg përfundimit të tij. Në këtë kohë, Prokuroria e Posaçme Anti-Korrupsion (SPAK), shpalli në kërkim pronarin e “Integrated Technology Service”, Klodian Zoto, si të dyshuar për përfshirjen në atë që konsiderohet “afera e inceneratorëve”.
Tashmë, Zoto dhe bashkëpunëtorë të tjerë të tij janë marrë të pandehur nga SPAK dhe prokurorët e posaçëm kërkojnë dënimin e tij me, më së paku 10 vjet burgim.
Këto zhvillime duket se kanë penguar ndërtimin e landfillit të Vlorës, i cili përfshihet periodikisht nga flakët “e qëllimshme”, të cilat mbysin me tym toksik banorët e qytetit bregdetar në kulmin e sezonit turistik.
