Dalin detaje të reja nga plagosja e dyfishtë mbrëmjen e sotme në Tropojë.
Policia gjatë reagimit zyrtar ka bërë me dije se një 49-vjeçar i identifikuar me iniciale B.S, pas sherrit banal në një servis makinash ka nxjerrë armën e zjarrit dhe ka plagosur shtetasin Ardit Buçpapajt.
Uniformat blu bëjnë me dije se si pasojë e të shtënave, është plagosur në këmbë dhe është jashtë rrezikut për jetën, edhe një kalimtar i rastit, qytetari i identifikuar Gazment Ponari.
Sakaq, policia ka shpallur në kërkim autorin e dyshuar të ngjarjes, 49-vjeçarin me iniciale B.S.
- Çfarë njoftoi policia për ngjarjen në Tropojë?
“Plagosi me armë zjarri 2 shtetas (njëri prej tyre kalimtar), pas një konflikti për motive të dobëta, identifikohet dhe shpallet në kërkim autori i dyshuar.
Shërbimet e Policisë kanë ngritur pika të shumta kontrolli për kapjen e tij.
Rreth orës 20:10, në Bajram Curri, në oborrin e një lokali, dyshohet se pas një konflikti për motive të dobëta, shtetasi B. S., 49 vjeç, ka plagosur me armë zjarri pistoletë, në këmbë, shtetasin A. B.
Si pasojë e të shtënave, është plagosur në këmbë dhe është jashtë rrezikut për jetën, edhe një kalimtar i rastit, shtetasi G. B.
Shërbimet e Policisë janë vënë në ndjekje të autorit, është rrethuar zona, si dhe vijojnë kontrollet në zonë dhe në ambiente të ndryshme, për të bërë të mundur kapjen e tij.
Grupi hetimor ndodhet në vendngjarje dhe ka sekuestruar kamerat e sigurisë dhe çdo provë tjetër që do t’i shërbejë dokumentimit të plotë të ngjarjes.
Vijon puna për zbardhjen e plotë të kësaj ngjarjeje”, njofton policia.
