Një aksident tragjik raportohet të ketë ndodhur një ditë më parë në Itali, ku kanë humbur jetën 2 persona dhe janë plagosur 3 të tjerë.
Mediat e huaja shkruajnë se ngjarja ndodhi afër qendrës së Pesaros, Itali, ku një automjet tip ‘BMW’ me dy persona brenda ka tentuar ti largohet patrullës së policisë, dhe është përplasur me një tjetër mjet duke përfunduar më pas në një kanal.
Mësohet se mjeti tip ‘BMW’ e zezë e drejtuar nga 27-vjeçari Sulltan Ramadani, maqedonas, i shoqëruar nga shoku i tij shqiptar Elvis Cola, të dy të njohur për drejtësinë, u përplas me një Fiat 500 X me tre të rinj brenda.
Nga përplasja e fortë ka humbur jetën pasagjerja e makinës Fiat 500 X, Martina Mazza, 31 vjeç, nënë e një djali 5-vjeçar, ndërsa kanë mbetur të plagosur motra e saj Alessia që drejtonte makinën dhe shoku i tyre Kevin.
Gjithashtu ka ndërrur jetë edhe shoferi i mjetit tip ‘BMW’ 27-vjeçari Ramadani, ndërsa u plagos rëndë shoku i tij, Elvis Cola.
Të plagosurit janë dërguar për ndihmë mjekësore, ndërsa autoritetet italiane vijojnë hetimet për zbardhjen e plotë të rastit.
