Pas disa muajsh hetimesh nga Prokuroria, policia e Tiranës ka goditur një grup të shpërndjarjes së lëndëve narkotike kokainë në kryeqytet.
Në kuadër të operacionit policor të koduar “Rapid dispatch” është bërë ndalimi i shtetasit Rei Trimi, 25 vjeç, banues në Tiranë. Gjithashtu u ekzekutuan masat e sigurisë “Arrest në burg” për shtetasit Vilson Hasani, 30 vjeç, dhe Mariglen Pupa, 26 vjeç, të dy banues në Tiranë, si dhe u shpallën në kërkim bashkëpunëtorët e tyre, shtetasit S. T., dhe A. B.
Nga verifikimet e kryera ka rezultuar se këta shtetas në bashkëpunim me njëri-tjetrin, siguronin lëndë të dyshuar narkotike të llojit kokainë dhe më pas e shisnin atë në zona të ndryshme të Tiranës, kryesisht në zonën e ish-Bllokut.
Në cilësinë e provës materiale u sekuestruan sasi lëndë e dyshuar narkotike kokainë, shuma parash, 7 aparate celulare dhe një automjet.
Policia njofton se vijon puna për kapjen e shtetasve S. T., dhe A. B. Materialet proceduale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
