Kryetari i Partisë Demokratike, Sali Berisha kërkoi dorëheqjen e ministrit të Brendshëm, Bledi Çuçi. Sipas Berishës, ai është përgjegjës për vdekjen e një prej anëtarëve të MEK gjatë aksionit të policisë në kampin e tyre në Manzë.
“Jam këtu për të deklaruar sot se në këtë moment ndjehem më shumë se kurrë njëri prej tyre, ndjehem një muxhahedin, luftëtar i lirisë. U shpreh atyre ndjenjat e mia më të sinqerta të mbështetjes dhe simpatisë. Ndjehem sot muxhahedin sepse qeveria amorale e këtij vendi vrau në bukë të vet, në strehë të vet, një luftëtar lirie. Ndjehem sot muxhahedin më shumë se kurrë, sepse aktakuza e djeshme që lexuat, është historia më e turpshme për një vend. Ajo ishte e shkruar në Teheran”, tha Berisha nga foltorja e Kuvendit, këtë të enjte.
“Aktakuza bazohej e tëra në shpifje, trillime të shërbimeve të ajatollahëve ndaj luftëtarëve të lirisë. Aktakuza përmbante elementë të poshtërimit ekstrem të Shqipërisë dhe shqiptarëve, sikur nuk është një vend anëtar i NATO-s, por sikur është një vasal i Iranit. Të marrësh ato për bazë, për të ushtruar një reprezalje më të turpshme në historinë e këtij vendi. Ndaj kërkoj largimin e menjëhershëm të ministrit të Brendshëm”, shtoi.
Më tej, ai kërkoi mbajtjen e një minute heshtje për anëtarin e MEK që humbi jetën: “Kërkoj të mbajmë një minutë heshtje për martirin e lirisë që ra për t’u bërë i pavdekshëm”.
Ndërkohë, kryetari i grupit parlamentar socialist Taulant Balla akuzoi se Berisha po e përdor ngjarjen për qëllime politike. “Përdorimi për qëllime politike edhe i një ngjarjeje për qëllime politike është diçka që ka 32 vite që bën ky personi që sapo foli, bën korbin, bën skifterin”, tha ai.
Një anëtar i MEK, 65 vjeç, humbi jetën gjatë kohës që zhvillohej aksioni policor të martën në kampin në Manzë. Avokati i muxhahedinëve tha se i ndjeri humbi jetën për shkak të gazit dhe dhunës së përdorur nga policia. Ndërkohë, ministri i Brenshëm Bledi Çuçi, tha se vdekja s’kishte asnjë lidhje me aksionin e policisë, ndërsa mohoi që efektivët të kenë ushtruar dhunë në ndonjë moment.
Aksioni policor për kontrolle në kampin “Arshaf 3” u miratuar nga GJKKO me kërkesë të SPAK, pas dyshimeve të policisë dhe prokurorisë se në aty mund të gjendeshin prova se nga ajo qendër janë realizuar sulme kibernetike ndaj institucioneve të Iranit.
