Komisioni i Pavarur i Kualifikimit ka konfirmuar në detyrë prokurorin e Tiranës, Julian Zonja.
Vendimi nga shpalla e parë e vettingut është shpallur këtë të mërkurë. Trupa e KPK e kryesuar nga Lulzim Hamitaj, me relatore Xhensila Pine dhe anëtare Firdes Shulin, ka marrë vendimin në mënyrë unanime për konfirmimin në detyrë të prokurorit Zonjam, pas dy seancave dëgjimore.
Në seancën e parë të zhvilluar më 15 maj, prokurori Zonja dha shpjegime për bilancin negativ lidhur me pagesën e një pjese të vogël të çmimit të një apartamenti si dhe për dy çështje profesionale, përfshirë hetimet për vdekjen tragjike të 17-vjeçarit Ardit Gjoklaj në landfillin e Sharrës në Tiranë në vitin 2016.
Komisioni vendosi riçeljen e hetimit administrativ dhe në seancën e dytë dëgjimore më 19 qershor, KPK i kërkoi shpjegime subjektit për rrëzimi në gjykatë të akuzës së tij ndaj dy punonjësve të landfillit të Sharrës për vdekjen e 17-vjeçarit Ardit Gjoklaj, si dhe për pezullimin e çështjes për administratorin dhe Bashkinë e Tiranës. Prokurori këmbënguli se hetimet ishin të plota dhe vdekja kishte ndodhur në landfill, por se hetimet për administratorin dhe Bashkinë e Tiranës vareshin nga vendimi i Apelit.
Julian Zonja përfundoi studimet në Shkollën e Magjistraturës në vitin 2004 dhe u emërua prokuror në Prokurorinë e Rrethit Fier. Prej vitit 2008, ai e ushtron funksionin në Prokurorinë e Rrethit Tiranë.
