Zëdhënësi i Ministrisë së Jashtme të Iranit, Nasser Kana’ani ka reaguar në lidhje me aksionin e djeshëm të policisë shqiptare në kampin e MEK në Manzë të Durrësit, me urdhër të SPAK për sekuestrimin e serverave, njësive kompjuterike dhe celularëve, nën dyshimet për sulme kibernetike dhe terrorizëm.
Mediat iraniane shkruajnë se Kana’ani, përmes një postimi në Twitter, ka deklaruar se muxhahedinët e MEK do të përbëjnë gjithmonë një kërcënim për sigurinë e Shqipërisë për shkak të natyrës së tyre terroriste.
“Shpresojmë që qeveria shqiptare të kompensojë gabimin e saj në pritjen e këtyre terroristëve”, shtoi ai.
Kujtojmë se uniformat blu hasën në kundërshtim dhe rezistencë nga ana e komunitetit iranian, ku u detyruan të përdornin edhe spraj individual.
