Një 40 vjeçar i shpallur në kërkim, është arrestuar ditën e sotme në Krujë.
Në pranga ka rënë Fredi Rrapi i cili ishte shpallur në kërkim për dhënie ndihme me qëllim kalimin e paligjshëm të kufirit.
Rrapi është arrestuar në një lokal teksa ishte ulur për të pirë një kafe.
“40-vjeçari, më datë 30 korrik 2022, ka qenë duke transportuar shtetas nga vendet e treta, me një automjet tip “Ford”. Pasi është konstatuar nga punonjësit e Policisë, në hyrje të qytetit të Shkodrës, ai nuk i është bindur urdhrave të tyre për të ndaluar, por është larguar dhe më pas ka braktisur automjetin” informoi sot policia e Krujës.
Ndaj 40 vjeçarit banues në Dukagjin, Krujë, Gjykata e Rrethit Gjyqësor Shkodër i ka caktuar masën e sigurisë “Arrest në burg”, për veprat penale “Dhënia ndihmë për kalim të paligjshëm të kufirit” dhe “Mosbindja ndaj urdhrit të punonjësit të policisë së rendit publik”.
Ai iu dorëzua policisë së Shkodrës për veprime të mëtejshme.
