Ish-kryebashkiaku i Durrësit, Vangjush Dako kërkon lirimin nga qelia.
Dako ka kërkuar në Apel ndryshim të masës së sigurisë arrest me burg dhënë më herët nga Gjykata e Posaçme.
Ish-kryebashkiaku akuzohet për shpërdorim detyre në dy raste.
Kallëzimi i parë për Dakon është bërë nga banorët e një pallati në lagjen numër 5, godinë e cila u bë e pabanueshme pas tërmetit të vitit 2019. Sipas banorëve, leja e ndërtimit ishte dhënë në kundërshtim me ligjin, pasi pallati përfundoi me 4 kate shtesë.
Kallëzimi i dytë është bërë nga ish-kreu i PD-së Durrës, Ferdinand Xhaferraj, sipas të cilit, Dako shpërdoroi fondet publike për një rrugë që u tenderua, por nuk u realizua. Padia e Xhaferrajt mbështetet edhe nga dy raporte të Kontrollit të Lartë të Shtetit, ku për projektin e rrugës së Plazhit nga Bërryli deri në Currila, i është shkaktuar një dëm buxhetit të shtetit në shumën 18 milionë lekë. Sipas SPAK, Vangjush Dako, jo vetëm nuk ka marrë masa për Kontrollin e Komisionit të Llogaritjes së Fondit Limit, por ka miratuar dhe urdhrin e prokurimit me vlerën e propozuar nga ky komision, çka i është shkaktuar dëm shtetit në vlerën 18 milionë Lekë.
Nga ana tjetër, avokati i Dakos është shprehur për mediat se në rastin e parë jemi në kushtet e parakrimit të veprës për të cilën klienti i tij akuzohet. Po ashtu, ka deklaruar se Vangjush Dako s’mund të mbajë përgjegjësi për veprimet e vartësve dhe për pasojë akuza e shpërdorimit të detyrës ndaj tij nuk qëndron.
