Kryeministri Edi Rama ka propozuar një draft për zgjidhjen e krizës në Kosovë, pa marrë dakordësinë më parë të kryeministrit Albin Kurtit.
I pyetur nga gazetarët, Rama tha se nuk ka ndarë asnjë informacion në lidhje me draft propozimin për zgjidhjen e krizës në Kosovë me vetë Kurtin, ndërsa deklaroi se dokumenti i është dorëzuar presidentit francez Macron dhe kancelarit gjerman Scholz.
Në një moment gazetarja e pyet Ramën në mënyrë të tërthortë për arrestimin e bujshëm të Vangjush Dakos, por kryeministri vendosi që të “kyçë” gojën për ish-kryebashkiakun socialist i cili akuzohet nga SPAK për akuzën e korrupsionit dhe falsifikimit të dokumenteve. Gjithashtu mësohet se hetimi i SPAK për Dakon është shtrirë edhe në verifikimin e pasurisë duke kërkuar verifikime nga institucione të ndryshme.
Gazetarja: A mendoni se duhet të shqetësoheni kaq shumë për Kosovën, e jo për një bashkëpuntor tuajin (Vangjush Dako) që ka marrë dardha dhe mollë pas kurrizit tuaj?
Edi Rama në një moment hesht dhe “injoron” pyetjen e gazetares: “Nuk flas për asnjë çështje tjetër, përveç Kosovës. Vazhdoni me pyetjen tjetër….(hesht)”.
- Drafri i porpozuar nga Rama pa dijeninë e Kurtit
I pyetur se pse po sulmon vazdhimisht Albin Kurtin, Rama shprehet se i vjen keq pse gjërat atje duhet të ndodhin në këtë mënyrë. Sipas Ramës, Kurtin po e fajëson bota e tërë demokratike për qëndrimin që po mban.
“Situata në veriun e Kosovës po merr fatkeqësisht përmasat e një tragjedie politike për Republikën e Kosovës. Deklaratat e aleatëve tanë strategjikë janë gjithnjë e më shumë alarmante dhe është e pakuptueshme arsyeja e ngurrimit të autoriteteve të Kosovës për zbutjen e një situate ku dukshëm e humbura e madhe është Kosova. Serbia po bën atë që ka bërë edhe herë të tjera, ndërsa Kosova po bën diçka që nuk e ka bërë kurrë më parë dhe si kurrë më parë po fajësohet botërisht nga të gjithë aleatët e kombit shqiptar.
Në kushtet kur marrëdhëniet e aleatëve me Kosovën po marrin gjithnjë e më shumë tone ultimative, unë jam këtu për të ndarë me ju një fakt të panjohur deri më sot. E kam ditur me kohë që nyja e dialogut do të ishte Asociacioni i komunave me shumicë serbe dhe bindja ime është që asnjëra nga palët nuk e do Asociacionin dhe do të bëjë çmos ta shtyjë në pafundësi, duke mbajtur të hapur krizën me lloj-lloj artificash. Besoj se krijimi i tij është çelësi për të hapur derën e afirmimit ndërkombëtar të Kosovës, njohjes së saj nga të gjithë, e uljes së saj në OKB dhe të gjitha forumet ndërkombëtare dhe e njohjes së ndërsjellë me Serbinë.
Dje i kam përcjellë Macron-it dhe Scholz-it një draft të Asociacionit, për të cilin kam vënë në dijeni edhe palën amerikane, gjë që është bërë pikërisht në rast se do të vinte kjo ditë, kur palët dhe në këtë rast për mua i pakuptueshëm është pozicioni i Kosovës, nuk po merren dot vesh as se kush duhet ta shkruajë këtë tekst, jo më se çfarë duhet të ketë teksti.
Është dokument konfidencial, që nuk pretendon të jetë zgjidhja ideale, por ju siguroj që është dokument i nivelit më të lartë ndërkombëtar që merr në konsideratë të gjitha arsyet për krijimin e Asociacionit”, tha Rama.
