Ndaj ish-kryebashkiakut të Durrësit Vangjush Dako ka një tjetër denoncim në SPAK pas tërmetit të 2019-ës, përveç atij që e çoi në pranga këtë të Martë.
Bëhet fjalë për një padi të 2 viteve më parë, nga 48 familje me rreth 200 banorë të një pallati të dëmtuar nga tërmeti i 26 nëntorit.
Sipas banorëve, pallati i tyre ishte dëmtuar nga tërmeti i 26 nëntorit dhe ishte klasifikuar i banueshëm ne nivelin e dëmit DS2, në një kohë kur animi tij është përcaktuar nga ekspertët në nivelin 51 cm, ndërsa eksperët privat e klasifikojnë mbi 60 cm. Ata akuzonin Bashkinë, Institutin e Ndërtimit si dhe Prokurorinë e Rrethit Gjyqësor të Durrësit, për fshehje të dëmit real të pallatit.
Ata u përfaqësuan nga avokati Baftjar Hysi, i cili në atë kohë shprehej nga dyert e SPAK se bashkia kishte abuzuar me lejet e ndërtimit.
“Ne kallëzojmë ish-strukturat e bashkisë së Durrësit, pra organi kompetent që ka lëshuar lejen e ndërtimit për këtë godinë dhe në mënyrë të veçantë sekretarin e KRRT-së së asaj kohe ose drejtori i Planifikimit dhe Zhvillimit Urban, ish-kryetari i bashkisë, kolauditori, supervizori, personat që e kanë marrë në dorëzim dhe çfarë është për të ardhur keq është fakti se edhe pse një studio e asaj kohe që ka bërë studimin e ka parashikuar jo më shumë se 7 kate, bashkia Durrës e ka dhënë 10 kate, firma ndërtuese e ka bërë 14 kate dhe ka bërë dhe garazhe. Kjo do të thotë të parashikosh vdekjen”, shprehej avokati Baftjar Rusi dy vite më parë në SPAK.
Ndërkohë banorët asokohe denoncuan se segmente të caktuar të shtetit manipuluan shkresat dhe tentuan t’i kthejnë qytetarët nëpër banesa edhe pse pallati ishte i pabanueshëm, madje përbënte rrezik edhe për ndërtesat përreth.
