Deputetja e PD-së, Albana Vokshi është shprehur se edhe parlamentarët europianë janë të vetëdishëm që në Shqipëri është cënuar pluralizmi politik.
Duke komentuar raportin e përgatitur nga Komisioni i Jashtëm i Parlamentit Europian për Shqipërinë, Vokshi është shprehur se tashmë edhe këta e dinë se çfarë ka ndodhur në Shqipëri dhe çfarë ka bërë qeveria me zgjedhjet.
“Tashmë parlamentarët europianë e kanë të qartë se çfarë ka ndodhur në Shqipëri, e kanë të qartë se ka qenë shteti që ka ndërhyrë dhe në ato hallka, edhe në pluralizmin politik në Shqipëri.
Pikërisht Edi Rama, përmes lobimit, çështja McGonigal, shantazhimit, kërcënimeve që i bëhej opozitës së dikurshme, ka dashur që ta zhbëjë, ta copëtojë. Është e dhimbshme, por ne duhet ta pranojmë që po shkojmë, ose jemi pothuajse në monizëm.
I vetmi pushtet që kemi fituar, duke luftuar kundër një bande shtetërore, ishte pjesa e këshilltarëve që ka fituar Partia Demokratike dhe kemi një zë të mirë tashmë në çdo këshill bashkiak. Ky është pushteti i vetëm që kemi fituar dhe e kemi fituar me shumë mund, duke pasur përballë një makineri të stërmadhe shtetërore, të lidhur me krimin”, tha Vokshi në SYRI TV.
