Agjencia e Mbikëqyrjes Policore, ka nisur hetimin për dy efektivë policie të “Shqiponjave”, të akuzuar për mitdhënie.
Dyshohet se këta efektivë i merrnin para qytetarëve që ndalonim, për të mos i arrestuar.
Në pranga ka rënë inspektor A.C., 36 vjeç dhe H.XH, 26 vjeç, pasi u kapën në flagrancë duke i marrë një drejtuesi mjeti 100 euro, me qëllim shmangien e ndëshkimit të tij me masë gjobe.
AMP po vijon hetimet lidhur me rastin. Në përfundim të hetimit priten pezullime, ndërsa mësohet se aksioni është ndërmarrë edhe në disa komisariate të Tiranës, ku janë vënë në sitë efektivë te rendit publik.
Njoftimi i policisë:
Tiranë – Agjencia e Mbikëqyrjes Policore Rajoni Tiranë ka arrestuar në flagrancë 2 punonjës policie, të dyshuar për kryerjen e veprës penale “Korrupsion pasiv i personave që ushtrojnë funksione publike”.
Të arrestuarit janë:
– Inspektor A.C., 36 vjeç, me detyrë Patrullë e Përgjithshme në Sektorin e Forcës së Posaçme “Shqiponja”, pranë Drejtorisë Vendore të Policisë Tiranë;
– Inspektor, H.XH, 26 vjeç, me detyrë Patrullë e Përgjithshme në Sektorin e Forcës së Posaçme “Shqiponja”, pranë Drejtorisë Vendore të Policisë Tiranë.
Arrestimi u krye pasi këta punonjës policie u kapën në flagrancë duke i marrë një drejtuesi mjeti 100 euro, me qëllim shmangien e ndëshkimit të tij me masë gjobe për shkelje të rregullave të qarkullimit rrugor.
Gjatë kontrollit personal, këtyre punonjësve iu gjetën dhe sekuestruan në cilësinë e provës materiale shuma prej 1420 euro, 8800 lekë, si edhe 4 aparate telefonike celularë.
