Prokurorët e SPAK kanë në duar provat e depozituara nga opozita, që sipas tyre, faktojnë manipulimin e zgjedhjeve të 14 Majit në Kuçovë.
Këtë të Hënë, në SPAK u paraqit deputetja demokrate Albana Vokshi, e cila në një prononcim për mediat pas daljes nga ambientet e prokurorisë, tha se dëshmoi lidhur me kallëzimin e depozituar për kryebashkiakun e Kuçovës Kreshnik Hajdarin dhe Pëllumb Salillarin.
Shkeljet
Vokshi tha se opozita ka depozituar prova për çështjen në fjalë.
“Dhashë të gjitha faktet, provat, fotot, videot dhe një pjesë do ta dërgoj edhe me shkresë zyrtare në lidhje me këta dy shtetas, të cilët përgjatë fushatës zgjedhore – kryetari i Bashkisë Kuçovë jo vetëm ka përdorur postin e tij, por edhe duke pasur një lidhje korruptive, klienteliste me biznesmenin Pëllumb Salillari. Kanë shfrytëzuar edhe paratë e buxhetit, burimet financiare dhe burimet njerëzore të Bashkisë Kuçovë për përfitime elektorale”, deklaroi ligjëvënsja demokrate për gazetarët.
Ajo bëri me dije se kallëzimi është bërë për disa vepra penale: Shpërdorimi i detyrës, korrupsion aktiv, korrupsion pasiv, kanosje dhe dhunim ndaj pjesëmarrësve në zgjedhje.
“Ky pra është një rast i pastër që dëshmon se paratë e korrupsionit dhe lidhja e qeverisë me oligarkët është përdorur për blerë votat, për të blerë zgjedhjet e 14 majit. Dëshmohet sesi partia shtet ka abuzuar me paratë e shqiptarëve, me të gjitha burimet shtetërore për të fituar zgjedhjet e 14 Majit. Ka disa video, ka disa prova, që vërtetojnë faktin është shtruar asfalt elektoral në disa rrugë dhe pa projekt, pa leje nga bashkia, pa tabela informimi, pa asnjë standard. Kanë qenë banorët e Kuçovës që kanë ndalur makineritë e kompanive që po shtronin dhe kanë ndaluar dhe punët, sepse ishin pa standarde dhe pa leje”, tha Vokshi.
Po ashtu, shtoi ajo, ka raste të tjera ku evidentohet projekte abuzive që janë dhënë me shumëfish të kostos reale të tyre, në abuzim të parave të buxhetit të Bashkisë Kuçovë për përfitime elektorale.
Gjithashtu, u shpreh Vokshi, ka video dhe prova konkrete ku shpërndahen thasët me ndihma derë më derë nga punonjësit e bashkisë Kuçovë.
Rreth 30 kallëzime për zgjedhjet
Deputetja bëri me dije nga ana e PD janë depozituar në SPAK dhe prokuroritë e rretheve rreth 30 kallëzime për krime zgjedhore në gjithë vendin.
Por, ajo shprehu rezerva për vullnetin e prokurorive për te hetuar.
“Ajo që unë dua të them është që PD ka dorëzuar rreth 30 kallëzime penale në SPAK dhe prokuroritë e rretheve. Ose janë ndalur hetimet, nuk janë hapur, në rastin e Edi Ramës ka disa kallëzime që PD ka bërë. Por sapo shohin emrin e Edi Ramës, refuzojnë që të hetojnë. Ka disa kallëzime të tjera që ka shprehur moskompetencë, si është dhe rasti i hapjes së zyrave të Kadastrës së Elbasanit, Himarës, etj. Ka dhe raste të tjera”, tha Vokshi, duke përmendur më tej probematika si përdorimi elektoral i administratës nga mazhoranca përmes aplikacionit “Akt1visti”, ndryshimi i vendvotimit para zgjedhjeve, etj.
