Kandidati i opozitës për Bashkinë Kuçovë në zgjedhjet e 14 Majit, Lefter Maliqi ka sjellë në kujtesë një kallëzim nga opozita për Pëllumb Salillarin.
Më 12 Maj, Partia Demokratike kallëzoi në SPAK Salillarin dhe kryebashkiakun e Kuçovës Kreshnik Hajadri, duke i akuzuar për veprat penale “Shpërdorimi i detyrës”, “Korrupsioni aktiv në zgjedhje” dhe “Kanosja apo dhunimi pjesëmarrësve në zgjedhje” kryer në bashkëpunim.
Në një reagim këtë të Hënë, Maliqi shprehet se për të dhe “për çdo qytetar të Kuçovës, veprimi i Partisë Demokratike për të kallëzuar në SPAK oligarkun Pëllumb Salillari dhe veglën e tij Kreshnik Hajdari dhe çdo kriminel që mbështeste dyshen e mësipërme, është vlerësim dhe një përpjekje për t’i dhënë Kuçovës atë që meriton”.
“Pellumb Hajdari dhe pengu i tij Kreshnik Salillari zyrtarisht në SPAK për të disatën herë. Mirënjohje për Partinë Demokratike të Shqipërisë dhe Kryetarin e saj Profesor Doktor Sali Berisha! I jam Mirënjohës dhe çdo banori në Kuçovë të cilët kanë votuar dhe atyre që kanë luftuar me mua krah për krah kundër sistemit të korruptuar dhe milionave të oligarkisë. Për mua dhe për çdo qytetar të Kuçovës, veprimi i Partisë Demokratike për të kallzuar në SPAK oligarkun Pëllumb Salillari dhe ‘veglën’ e tij Kreshnik Hajdari dhe çdo kriminel që mbështeste dyshen e mësipërme, është vlerësim dhe një përpjekje për t’i dhënë Kuçovës atë që meriton. Mirënjohje! E drejta triumfoftë për të gjithë! S’ka kthim prapa”, shkruan Maliqi në një postim në FB.
Një kallëzim në SPAK është depozituar dhe nga vetë Maliqi pas zgjedhjeve, i cili është shprehur se Salillari ka blerë vota masivisht në favor të Hajdarit dhe se kanë ushtruar po ashtu të tjera forma të manipulimit të zgjedhjeve.
Po ashtu, koalicioni “Bashkë Fitojmë” ka ankimuar në KAS rezultatin e zgjedhjeve për Kuçovën.
