Një plagosje me armë ka ndodhur mesnatën e sotme në qytetin e Kuçovës. Ngjarja ka ndodhur në rrugën e lagjes “1 Maji” në këtë qytet.
Pak para mesnate, rreth orës 23.30, ky shtetas ka mbërritur i plagosur në spital, me plagë të shkaktuara nga arma e zjarrit.
Mjekët e spitalit të Beratit konfirmojnë se i plagosuri kishte humbur shumë gjak dhe ishte në gjendje kritike për jetën.
Denald Grymshi është transferuar në Spitalin e Traumës në Tiranë, pasi raportohet se është në gjendje të rëndë për jetën.
Policia ka shpallur në kërkim 4 autorët e dyshuar të krimit:
– Ledio Serdari, 22 vjeç, banues në Kuçovë
– Albion Thoma, 22 vjeç, banues në Kuçovë
– Vasil Prendi, 23 vjeç, banues në Kuçovë
– Arben Tabaku, 23 vjeç, banues në Kuçovë
Këta shtetas dyshohet se në bashkëpunim me njëri-tjetrin, pas një konflikti të çastit, për motive të dobëta, në lagjen 1Maj, Kuçovë, kanë plagosur me armë zjarri shtetasin Denald Grymshi. Vijon puna për kapjen e 4 shtetasve të shpallur në kërkim dhe për zbardhjen e plotë të rrethanave të ngjarjes.
Njoftimi i plotë i Drejtorisë Vendore të Policisë Berat:
Rreth orës 23:30, të mbrëmjes së djeshme, është paraqitur për ndihmë mjekësore në Spital, i plagosur me armë zjarri, shtetasi D.G., 24 vjeç, banues në Tiranë, i cili po merr ndihmë mjeksore në spital.
Si rezultat i punës hetimore profesionale intensive të bërë nga specialistët për hetimin e Krimit në Komisariatin e Policisë Kuçovë në bashkëpunim me shërbimet e DVP Berat, u bë i mundur identifikimi dhe shpallja në kërkim e autorëve të dyshuar, shtetasve: L.S., 22 vjeç, A.Th., 22 vjeç, V.P., 23 vjeç, dhe A.T., 23 vjeç, të katërt banues në Kuçovë.
Këta shtetas dyshohet se në bashkëpunim me njëri-tjetrin, pas një konflikti të çastit, për motive të dobëta, në lagjen 1Maj, Kuçovë, kanë plagosur me armë zjarri shtetasin D.G. Vijon puna për kapjen e 4 shtetasve të shpallur në kërkim dhe për zbardhjen e plotë të rrethanave të ngjarjes.
Materialet procedurale iu referuan Prokurorisë, për veprime të mëtejshme.
