Ish-kryetari i Partisë Demokratike, Lulzim Basha zhvilloi këtë të Mërkurë një takim me të rinj. Gjatë fjalës së tij, Basha tha se në zgjedhjet lokale pati një bojkotim masiv të të rinjve. Dhe kjo, sipas tij, ndodhi sepse nuk kishte alternativë politike.
“Ka kohë që nuk flitet për hallet e njerëzve. Politika riciklon të vjetrën. Si do krijohet hapësira për të rinjtë nëse nuk hapet rruga”, u shpreh Basha.
14 maji, theksoi ai, është data e skadencës përfundimtare të sistemit politik në Shqipëri.
Ai sulmoi dhe ndryshimet kushtetuese të vitit 2008 pas një marrëveshje Rama-Berisha, për të cilat tha se i hoqi qytetarëve mundësinë për të zgjedhur.
Basha tha se e vetmja rrugë që zëri i qytetarëve të dëgjohet janë listat e hapura 100 përqind. “Të nisim bashkë një udhëtim për të ndryshuar sistemin politik”, u shpreh ai.
Po ashtu, riktheu idenë e një vetingu për politikanët. “E dyta që propozoj për ta bërë politikën një instrument shërbimi ndaj qytetarëve është vetingu politik”, tha.
Basha foli për domosdoshmërinë e kufizimit të mandateve dhe mundësinë e votimit të emigrantëve.
“Dua të më besoni që jam serioz në këtë platformë për t’jua dhënë juve kontrollin mbi politikanin”, tha Basha.
Me dorëheqjen e Enkelejd Alibeajt nga drejtimi i PD-së së vulës, ka pasur zëra se kjo ka qenë një lëvizje për të rikthyer Bashës në krye të partisë.
