Një ditë pas dorëzimit në Polici të Habib Rexhës, autorit të vrasjes së Arjan Gosës në Kavajë, sot janë gjetur makina dhe arma me të cilin ai ka kryer krimin.
Mediat bëjnë me dije se Rexha i kishte fshehur armën dhe makinën në zonën e Plazhit në Durrës, me qëllim për të humbur gjurmët. Po ashtu mësohet se armë është dërguar në laboratorin e kriminologjisë, me qëllim për t’u parë nëse kjo armë është përdorur apo jo në krime të tjera. Habib Rexha u vetëdorëzua në polici pasi ekzekutoi me një plumb në kokë Arian Gosën në Kavajë.
Ka qenë pikërisht 31-vjeçari ai që ka treguar se ku e kishte fshehur armën. Habib Rexha ka treguar se pak pas ngjarjes i ka lënë me qëllim në këtë zonë, si makinën dhe armën, që të humbte gjurmët.
Ngjarja ndodhi më 21 maj, ku Arjan Gosa u qëllua me plumb në kokë në sy të babait të tij, me të cilin kishte dalë për të pirë një kafe.
Më pas Rexha u largua nga vendi i ngjarjes në këmbë. Motivi pse 31-vjeçari ka ndërmarrë këtë akt të rëndë është hakmarrja, pasi dy muaj më parë, vëllai i Gosës dhe vëllai i tij u konfliktuan me njëri-tjetrin në mes të Kavajës dhe të dy mbetën të vrarë.
- Dëshmia e Habib Rexhës në polici
Është zbardhur edhe dëshmia e 31-vjeçarit para grupit hetimor, ku ka thënë se vrasjen e kreu pasi ai dhe familja e tij ndiheshin të kërcënuar. Ai ka deklaruar se kur Arian Gosa ishte kthyer nga Italia, kishte thënë se do ta shuante familjen Rexha.
“Une jam autori i vrasjes së Arjan Gosës. Vrasjen nuk e kam kryer për gjakmarrje, por për arsye se Arjani kur ishte kthyer nga Italia është shprehur se do ta na shuante si familje. Kësaj, unë i bëra parapritë. Sa të na vriste ai neve, pashë të udhës ta vrisja unë i pari. Vëllezërit e mi dhe babai nuk kishin fare dijeni. E dija qe Arjani pinte kafe te lokali pranë shtepisë së tij. Shkova e qëllova dhe më pas u largova në drejtim të Durresit. Pistoletën e hodha në afërsi të pistës Iliria në Durrës tek ca gurë”, ka deklaruar ndër të tjera Habib Rexha.
