Të paktën 4 këshilltarë të LSI në Këshillin Bashkiak të Durrësit bashkuan votat me ata të PS-së duke miratuar buxhetin për vitin 2018.
Grupi i këshilltarëve të LSI-së kishte vendosur t’i bënte bllokadë kryebashkiakut Vangjush Dako, duke bojkotuar mbledhjen që kishte në rendin e ditës edhe miratimin e buxhetit të vitit 2018.
Por katër këshilltarë të LSI-së u paraqitën në mbledhje duke votuar pro buxhetit me vlerë 48 miliard lekë, si edhe disa pika të tjera që ishin në rendin e ditës.
Prania dhe bashkimi i votave të 4 këshilltarëve të LSI me socialistët, i dhanë mundësinë Vangjush Dakos të kalojë buxhetin, ndërsa këshilltarët e PD nuk ishin të pranishëm.
Për votën pro të 4 këshilltarëve të LSI-së në këtë mbledhje, ka reaguar Jeton Rexhmati, këshilltar i LSI-së dhe anëtar i komisionit të medias. Rexhamti tha se ne kemi pasur një vendim grupi për të mos marrë pjesë në mbledhje dhe nuk e kuptojmë se përse 4 këshilltarët në fjalë kanë marrë pjesë, por për këtë do të ketë një mbledhje për të marrë masë ndaj tyre.
Megjithatë, Këshilli bashkiak në Durrës ka miratuar me 26 vota pro buxhetin e vitit 2018, ndërkohë që për këtë numër votash është dashur edhe vota e 4 këshilltarëve të LSI-së dhe një e PR.
Pas miratimit të projektbuxhetit kryetari i bashkisë së Durrësit Vangjush Dako tha se ky është një buxhet i balancuar që do ti vijë në ndihmë gjithë banorëve të Durrësit, pasi në të janë parashikuar investime në infrastrukturë dhe shërbime për qytetarët. Vlera totale e buxhetit të vitit 2018 është parashikuar në rreth 4.8 miliard lekë të reja.
