Partia Demokratike ka përshëndetur stërvitjen e madhe të ushtrive të NATO-s në Shqipëri , ‘Defender Europë 2023’.
Në një deklaratë zyrtare, PD shprehet se këto manovra janë të rëndësishme për Shqipërinë dhe sigurinë e saj, teksa thekson se garanton mbështetje totale për përmbushjen e këtij misioni.
Deklarata e Partisë Demokratike:
Partia Demokratike e Shqipërisë përshëndet fillimin e manovrave të mëdha të NATO-S ‘Defender Europe ‘23’ në Shqipëri.
Këto manovra janë të një rëndësie të madhe për Shqipërinë dhe sigurinë e saj, por edhe për paqen dhe sigurinë në Europë. Këto manovra së bashku me manovrat e NATO-s që po zhvillohen në Kosovë janë një mesazh i fuqishëm që Aleanca e Atlantikut të Veriut i dërgon agresorit rus për përpjekjet e tij për destabilizimin e rajonit dhe ambiciet e tij ekspansioniste.
Partia Demokratike si forca politike që anëtarësoi Shqipërinë në Nato, mbështet plotësisht garantimin e të gjitha lehtësirave në territorin tokësor, ujor dhe ajror të Shqipërisë që i nevojiten Aleancës për përmbushjen e misionit të mbrojtjes së paqes dhe sigurisë në hapësirën euroatlantike.
