Kandidati i koalicionit “Bashkë Fitojmë” për bashkinë e Kuçovës, Lefter Maliqi, ka treguar mekanizmat se si sipas tij, u manipulua rezultati i zgjedhjeve të 14 majit.
Në studion e emisionit televiziv “Të Paekspozuarit”, Maliqi tha se kanë arritur të sigurojnë fakte dhe regjistrime lidhur me vota të pavlefshme që kanë kaluar në kutitë e PS dhe se për këtë kanë bërë sot ankimin në KQZ. Ai paralajmëroi se nesër do bëhet kallëzimi në SPAK.
“Aty është bërë një krim elektoral, rreth orës 11 dorëzohen të gjitha kutitë në KZAZ dhe 10 min më vonë futët nga dera tjetër drejtori i qendrës kulturore dhe aty bëhet gjëma e madhe. Në 11 30, KQZ thotë do iki të lahemi edhe vijmë në 12 h, i nxjerrin vëzhguesit jashtë, dhe mbyllet KZAZ, dhe këta kthehen në 1 pa 20min. Nuk dimë se çfarë është bërë brenda, se i kanë nxjerrë jashtë, fillon numërimi dhe deri në ora 11 ishte Lefter Maliqi 500 vota para, 17 kutitë e fundit, gjejmë vula të MB, gjejmë kuti votimi pa vula, të gjitha i kemi të filmuara. Kemi gjetur mospërputhje, fletë të pavlefshme, që i hidhnin te kandidati i PS. Është bërë një masakër, sot kemi bërë ankimin , nesër do bëhet kallëzimi në SPAK”, tha Maliqi.
Ai u shpreh se kandidat kundërshtar nuk kishte Kreshnik Hajdarin e PS, por Pëllumb Salillarin. Ky i fundit, tha Maliqi ishte i përfshirë në blerje votash në mënyrë masive.
Ai akuzoi policinë për bashkëpunim në këtë manipulim të procesit zgjedhor.
“Vojo Peçi edhe një oficer krimesh me mbiemër Koçi u bënin presione qytetarëve. Vojo Peçi është vëllai i Tërmet Peçit, ka qenë gjashtë vjet shef policie në Kuçovë. Ai bënte presione”, tha Maliqi.
