Deputetja e Partisë Demokratike, Jorida Tabaku ka reaguar pasi kandidati i grupit të Alibeajt, Roland Bejko dështoi në zjedhjet lokale duke u renditur në vendin e katërt, pas Arlind Qorit.
Tabaku thotë se “denoncimi i humbjes pa reflektim” është kthyer në boomerang elektoral për demokratët, prandaj zgjidhja më e mirë sipas saj, do të ishte “bashkimi me një analizë” për të kuptuar gabimet e drejtuesve të opozitës.
Gjatë gjithë muajit të fushatës elektorale, Jorida Tabaku nuk bëri asnjë deklaratë në mbështetje të asnjë kandidati, as në ndihmë të Bejkos, as në ndihmë të Këlliçit.
Statusi i plotë i Jorida Tabakut:
“Sot, jam me kokën ulur para demokratëve, votuesve të djathtë e kujtdo. Nuk arritëm dot të japim një alternativë përbashkuese për PD, që pavarësisht kësaj sherrnajës që kush bën çfarë i morrëm për të mirëqenë se njerëzit do votojnë logon apo mitin me sy mbyllur. Nuk mund të jetë zgjidhje dhe as alternativë mllefi! Nuk mund të jetë zgjidhje dhe alternativë përleshja e pakuptimtë që ka ndarë demokratët. Nuk mund të jetë zgjidhje apo alternativë izolimi i vazhdueshëm dhe fshehja pas alibive që nuk na bëjnë fitues por na zvogëlojnë përditë. Në çdo kuti votimi nga Vermoshi në Konispol, mesazhi i shqiptarëve dhe demokratëve është i qartë; Ne duhet të pranojmë gabimet tona duke e përdorur krenarinë tonë për të ndërtuar një PD ndryshe dhe jo për të mohuar faktet! Askush nuk mund te mohojë problemet me zgjedhjet si krimi, korruptimi, blerja e votës, presionet. Por ndryshe nga çdo herë tjetër duhet të bëjmë së pari një vështrim nga vetja!
Koha dhe humbjet e njepasnjëshme kanë treguar që denoncimet pa reflektim janë kthyer në bumerang elektoral. Prandaj A-ja është bashkimi me një analizë se përse mbjellja e urrejtjes mes demokrateve nuk mbjell dot shpresën tek shqiptarët po dëshpërimin! PD duhet të ringrihet nga hiri dhe duhet të jetë alternativë për shqiptarët. Nuk mund të jemi bojkoti i shqiptarëve kur mund të jemi lehtësisht alternativa e një shumice!”, shkruan Tabaku.
- Sali Berisha ka refuzuar të pranojë rezultatin e zgjedhjeve të 14 majit
Më herët kaniddati i koalicionit “Bashkë Fitojmë”, Belind Këlliçi dhe kreu i PD-së, Sali Berisha njëzëri kanë refuzuar të pranojë rezultatin e zgjedhjeve lokale të 14 Majit, duke u shprehur se qytetarët u intimiduan nga grupet e bandave të stacionuar pranë qendrave të votimit dhe e shprehën vullnetin e tyre nën presion dhe shantazh konstat.
Procesi zgjedhor për Berishën ishte një farsë dhe këtë kryedemokrati e argumentoi duke iu referuar raportit paraprak të OSBE-ODIHR për shkeljet e hasura gjatë votimeve, të cilat lidheshin me blerjen e votës, presionin ndaj administratës dhe votimin në grup ose familjar.
