Qytetarët shqiptarë në 61 bashkitë e vendit votuan sot për të zgjedhur drejtuesit e rinj lokalë, të cilët do të drejtojnë këto njësi vendore në 4 vitet e ardhshme.
Teksa ka nisur publikimi i rezultateve të para nga numërimi manual, dy nga bashkitë ku u votua në mënyrë elektronike, Kamza dhe Vora u fituan prej Partisë Socialiste dhe një rezultat paraprak për Elbasanin nxjerr fitues po të majtët me kryebashkiakun Gledian Llatja.
Lidhur me këto zhvillime, analisti Fatos Lubonja tha në emisionin “Open” se çdokush në Shqipëri duhet të ndihet i kërcënuar pasi tanimë, kryeministri Edi Rama ka marrë në dorë të gjitha institucionet dhe pushtetet.
Ai deklaroi se Rama ka finalizuar me zgjedhjet e sotme një grusht institucional dhe rezultatin e këtyre zgjedhjeve e njoftoi paraprakisht kur tha se PS do fitonte më shumë se 50 bashki.
“Që kur Rama kërkoi tepsinë, filloi atë grushtin gradual të shtetit, grusht institucional për të kapur të gjitha pushtetet. Logjika është që këtu votën e merr leku. Pasi mbaroi kjo histori, filloi përçarjen e PD. Këtu kemi një strategjia, grusht shteti institucional hap pas hapi…
Unë të kap ty, të vendos në përgjime, ndërsa ata të mitë vazhdojnë vjedhin. Ky është problemi, sepse ke shtetin kundër. Nuk ka më fuqi, dhe njeriut më të ndershëm do t’i gjej diçka, do t’i çojë një provokator. Kur arrin puna që ka policinë dhe prokurorinë me vete, çdokush duhet të ndihet i kërcënuar. Kur ke të gjitha institucionet, e nxjerr vetë rezultatin, siç tha 50+”, tha Lubonja.
