Nga Boldnews.al
Informacionet nga terreni që mbërritën së fundmi në zyrën e Edi Ramës dhe në shtabin qendror elektoral të tij tregojnë se kandidati socialist për Bashkinë e Himarës, Jorgo Goro, do të humbasë thellë përballë rivalit të “Bashkimit për Fitore”, Fredi Beleri.
Kjo është arsyeja kryesore që Edi Rama ka shfrytëzuar javën e fundit të fushatës elektorale për të sulmuar dhe denigruar televizion më televizion kandidatin Beleri.
Rama ka shfrenuar fjalorin e tij lincues, me larmi shprehjesh ndaj Belerit: “i paudhë”, “injorant”, “i pashkollë”, “nuk di të flasë”, e të tjera e të tjera.
Por, fjalët e Ramës duket se nuk kanë qenë të mjaftueshme për të përmirësuar shifrat e sondazheve të brendshme të Partisë Socialiste për Himarën.
Ndaj, situata precipitoi në mesnatën mes të Enjten dhe të Premtes, vetëm pak orë para zgjedhjeve për pushtetin lokal të 14 Majit.
Një dyzinë forcash policore, përfshirë oficerët e Policisë së Himarës, Vlorës dhe Forcat Speciale, mësynë në lokalin e Fredi Belerit në Himarë dhe e arrestuan, nën dyshimet e “blerjes së votave”.
Deri në momentin e publikimit të këtij shkrimi, ende nuk janë bërë publike të dhënat që implikojnë Fredi Belerin në kryerjen e veprës penale.
Ajo që dihet deri më tani, është fakti që sondazhet e Edi Ramës e nxirrnin fitues Belerin përballë socialistit Jorgo Goro.
Edi Rama ka vendosur që të mos e lëshojë Himarën dhe po përpiqet me çdo kusht që të mbajë në zyrë “beniaminin” e tij, Goro, megjithëse nuk duket se gëzon respektin e liderit socialist.
Himara i duhet Ramës, pasi është “vendi i mrekullive” të investitorëve strategjikë. Për këtë arsye, ai do të bëj gjithçka ka në dorë, me të gjitha mjetet, për të mos e lëshuar drejtimin e qytezës bregdetare, edhe pse votat e qytetarëve duket se do të hedhin pas krahëve kandidatin e tij, Jorgo Goro.
