Gazetari Enver Doçi denoncoi publikisht këtë të mërkurë se një prej truprojave të zëvendësministres Belinda Balluku ka tentuat ta dhunojë fizikisht.
Teksa raportonte për televizionin News 24, gazetari tregoi se konflikti nisi pasi ai ishte drejtuar për të marrë pjesë si qytetar në takimin elektoral në Bulqizë ku prezente ishte dhe zëvendësministrja Belinda Balluku.
Por, siç tregoi më tej, shoqëruesi i sigurisë së Ballukut, e cila është dhe drejtuesja e fushatës së PS-së për Qarkun Dibër, nuk e ka lejuar të marrë pjesë. Madje, sipas tij, ka tentuar ta godasë.
“U futa brenda, nuk kisha as kamera dhe pasi shoqëruesi i Ballukut më doli para dhe më bllokoi rrugën. Më tha: ‘Kush je? Ku shkon? Me kë parti je?’. I thashë që vota është e fshehtë. Unë do futesha brenda si banor. Truproja, pasi i thashë që do futem brenda më tha kush je, i tregova emrin dhe i thashë që jam banor i qarkut Dibër. Në atë moment kam ndezur celularin dhe kam regjistruar bisedën që bëra. Ai nuk fliste por bënte gjeste me duar. Ai është i shëndoshë, i veshur me rroba të zeza. Ai tentoi të më qëllonte, unë nuk isha si gazetar, por si qytetar i thjeshtë”, tha Doçi.
Nga ana e ministres, nuk ka një reagim për rastin.
