Kryetari i PD-së, Sali Berisha mban një qëndrim ndryshe nga kryeministri Edi Rama lidhur me zgjedhjet e 14 majit. Ndërsa Rama u kërkon mbështetësve të opozitës mos të votojnë, Berisha nga ana tjetër kërkon pjesëmarrje të të gjithë qytetarëve në zgjedhje.
“Lutja ime është të mbledhim çdo votë në çdo skaj të kësaj malësie. Edi Rama është qeveritari i parë që i thotë qytetarëve mos dilni në votime. Ky ka frikë dhe tmerr nga vota juaj. Kjo tregon se ai është i pashpresë. Ndaj dhe ne duhet të votojmë të gjithë ndryshimin, të votojmë Isa Ramën, të votojmë 1-shin, se kemi votuar liritë tona”, tha Berisha nga Malësia e Madhe, ku u ndal këtë të mërkurë në kuadër të një takimi elektoral.
Lideri i opozitës theksoi se, Edi Rama po përpiqet të mbjellë përçarje fetare me injorancë. Sipas tij, 14 maji është dita e ndarjes me regjimin që përzuri me përçmim mbi 1 milion shqiptarë. Berisha tha se, nuk ka pasur asnjë qeveritar që të ketë vendosur një tirani varfërie me kaq shpejtësi mbi shqiptarët, sa Edi Rama.
Lidhur me përdorimin e fjalorit banal të kryeministrit Rama, Berisha tha se ai po e përdor këtë gjuhë për të mos dhënë asnjë llogari te qytetarët, por t’i mbulojë gjurmët e vjedhjeve të tij me togfjalëshe banale.
