Trupat e pajetë të dy turisteve të huaja që ranë në greminë janë nxjerrë nga policia.
Ngjarja e rëndë ndodhi pasditen e sotme por për shkak të terrenit të vështirë ndëryrja ishte e pamundur. Për të nxjerr trupat, u angazhuan shumë trupa të policisë. Dy turiste të huaja, njëra belge dhe tjetra franceze kanë vdekur pasi janë rrëzuar dhe kanë rënë në greminë në Valbonë.
“Pavarësisht territorit shumë të vështirë dhe motit të keq me mjegull dhe me borë, shërbimet e Policisë, pas shumë kërkimesh, kanë bërë të mundur që në vendin e quajtur “Qafë Valbonë”, të gjenin trupat e pajetë të dy turisteve, shtetases belge B. M. dhe shtetases franceze J. B.”, thuhet në njoftimin e policisë.
Ato nuk kanë qenë të shoqëruara me guidë, apo persona që e njohin zonën malore.
Ndërkaq, një ditë më parë, në jug të Shqipërisë, në zonën e Skraparit, në kanionet e lumit Osum, është rrëmbyer nga rrjedha e ujit një turist holandez. Ai ka qenë duke eksploruar zonën, së bashku me bashkëshorten e tij, kur janë rrëmbyer nga uji.
Bashkëshortja e tij u gjet nga një grup turistësh që po vizitonin kanionet dhe u dërgua në spital, dhe tani është jashtë rrezikut për jetë.
Ndërsa 68-vjeçari nuk është gjetur ende, edhe pse polumbarët po vijojnë kërkimet në lumin Osum.
Edhe çifti i turistëve holandezë nuk ishte i shoqëruar nga ndonjë guidë turistike.
