Nga Korça, ku së bashku me Sali Berishën u ndalën në takimin përmbyllës së fushatës elektorale për qarkun, kreu i Partisë së Lirisë Ilir Meta iu përgjigj thirrjes që Edi Rama i drejtoi banorëve të Kavajës pasditen e sotme.
Teksa kryeministri nga thirrja drejtuar grave për t’i mbajtur burrat mbyllur kaloi te “flini gjumë të dielën”, Meta i kujtoi se 14 Maji është dita e ndryshimit që qytete që kanë sakrifikuar për demokracinë si Kavaja, mezi po e presin për t’i treguar vendin “Rilindjes”.
Kreu i PL theksoi më tej se ajo çka Rama kërkon nuk mund të ndodhë sepse demokratët e shqiptarët po presin me padurim ndryshimin.
“Rama në 4 vjet uzurpoi në mënyrën më të pabesë të gjitha bashkitë dhe këshillat bashkiake si në asnjë vend të prapambetur të Afrikës.
Edi Rama vetëm një orë më parë bënte thirrje demokratëve nga Kavajë që ditën e diel të flinin gjumë. Demokratët nga Kavaja dhe gjithë Shqipëria kanë katër vjet që mezi e presin këtë ditë.
Ndryshimi është i padiskutueshëm nga Tropoja dhe Kukësi deri në Sarandë dhe Konispol. Korça ka privilegjin të jetë kryezonja e ndryshimit”, tha Meta.
