Një dramë e paimagjinueshme është regjistruar në Arta të Greqisë, teksa raportohet se një foshnje vetëm 5 muajshe ka ndërruar jetë nga pakujdesia e të atit.
Mediat greke bëjnë me dije se babai e ka harruar për tre orë në makinë vogëlushen e tij 5.5 muajshe, kur ishte nisur nga shtëpia për ta çuar atë në një çerdhe dhe më pas do të shkonte në punë.
Për disa arsye që askush nuk mund t’i shpjegojë, i ati i së ndjerës e ka harruar që e kishte fëmijën në sediljen e pasme dhe shkoi menjëherë në punë.
Kur nëna e vogëlushes shkoi në çerdhe disa orë më vonë për të marrë fëmijën, edukatoret i thanë se vajza e vogël nuk shkoi kurrë në çerdhe.
Nëna ka telefonuar në telefon të atin e foshnjës për të parë se çfarë kishte ndodhur saktësisht dhe pse fëmija nuk shkoi në çerdhe, duke bërë që ky i fundit vetëm atëherë të kuptonte se e kishte harruar vogëlushen në makinë.
Ai vrapoi menjëherë dhe e gjeti të lidhur në ndenjësen e fëmijës pa ndjenja dhe me shkumë që i dilte nga goja, ndoshta edhe për shkak të temperaturave të larta dhe mungesës së ajrit.
Menjëherë foshnja u dërgua në spitalin e Artës. Mjekët që morën foshnjën e kuptuan pothuajse menjëherë se vogëlushja kishte ndërruar jetë dhe se nuk mund të bënin asgjë.
Kur u thanë prindërve se fëmija i tyre kishte vdekur, të dyve u ra të fikët dhe mjekët i dërguan në ambulancë për t’i dhënë ndihmën e parë.
Një hetim paraprak për atë që ka ndodhur saktësisht dhe për mënyrën sesi një baba mund të kishte harruar për kaq shumë orë që kishte fëmijën e tij në makinë, ka nisur nga policia lokale.
Për shkakun e vdekjes së foshnjës u urdhërua autopsia dhe trupi u dërgua në Janinë.
