Premtimin elektoral për rritje pagash që do të niste nga 1 Maji nuk e mbajti dhe përgjegjësinë ia faturoi deputetëve të Kuvendit të Shqipërisë, duke drejtuar gishtin edhe nga ata të selisë rozë, por Edi Rama kur na ndajnë 1 javë nga zgjedhjet lokale të 14 Majit, po përdor një tjetër makinacion për të fituar vota.
Ashtu siç ishte lajmëruar javën e shkuar nga ministrja e Bujqësisë, Frida Krifca, këtë të hënë ka nisur shpërndarja e naftës pa akcizë për vitin 2023, pas aplikimeve nga fermerët që u mbyllën në prill.
Ndryshe nga çfarë kishte ndodhur në vitet e kaluara, në prag të zgjedhjeve, ministria ka vendosur që skemën e subvencionimeve ta vendos në funksion të makinerisë elektorale, duke shpërndarë një sasi nafte, e cila është vetëm për kulturat pranverore dhe jo për të gjithë vitin.
Mësohet se ata që aplikuan të parët pas thirrjes se Ministrisë së Bujqësisë, për skemat subvensionale, janë kontigjenti që po tërheqin edhe kartat e naftës, ndërsa përfituesit kanë rrëzuar propagandën e qeverisë duke pohuar se këtë vit kanë marrë më pak sasi nafte për të njëjtën sipërfaqe, për të cilën aplikuan një vit më parë.
Fermerët gjithashtu kanë shprehur shqetësimin e tyre se dhënia e naftës pa akcizë në këtë periudhë dhe me nxitimin nga Rama e Krifca është për shkak të fushatës elektorale, ashtu siç u bë me “lëmoshën” prej 5 mijë lekësh të rinj që iu shpërnda pensionistëve.
Sipas shifrave, rezulton se ministria po shpërndan në total në agjensinë rajonale të ekstensionit bujqësor në Lushnjë 588 karta nafte. Gjithashtu janë shpërndarë 480 karta për Fierin, 180 për Gjirokastrën, 97 për Vlorën dhe 197 për Divjakën.
Të pesta këto bashki prej disa mandatesh qeverisen prej të majtës dhe dyshimet se shpërndarja e naftës për të marrë në këmbim vota për kandidatët e Ramës, mbetet konkrete.
Sakaq, bëhet me dije se përllogaritja e sasisë se naftës këtë vit është bërë në bazë të kulturave.
Për drithërat jepet 63 litër naftë për ha, për drurët frutorë 81 litër për ha, për perimet 81 litër për ha dhe për foragjeret 96 l/ ha.
