Hidrocentrali i Skavicës dhe rruga e Arbrit ishin në fokusin e takimit elektoral në kuadër të fushatës për zgjedhjet e 14 majit, që lideri i opozitës Sali Berisha zhvilloi sot në Dibër, ku prezantoi kandidatin për kryebashkiak të koalicionit “Bashkë Fitojmë”, Ismail Uka.
Teksa ironizoi inaugurimin që i bëri Rama pak ditë më parë rrugës së Arbrit duke thënë se ky ishte i pesti në radhë, në 10 vite të “Rilindjes” në pushtet, por punimet në këtë aks kurrë nuk përfunduan, Berisha u kërkoi dibranëve që me votë të ndalin dashakeqësin që me Skavicën do përmbytë Dibrën.
Berisha u shpreh se sot Dibra “është para alternativës të jetë apo të mos jetë”, dhe se hidrocentrali i Skavicës do të sjellë përmbytjen e qytetit.
“Sot Dibra është para alternativës të jetë apo të mos jetë, sot një armik i egër i Dibrës e ka vendosur para alternativës të shuarjes apo ekzistencës së saj. Hidrocentrali i Skavisë është mbytja e Dibrës, e pjesës së saj më pjellore, pjesës së saj më historike, e të shkuar, të sotmes dhe të ardhmes së Dibrës, Kurrë ndonjëherë ky vend s’ka pasur rrezik ekzistencial sa ç’ka tani. Rama në zbatimin të politikave antishqiptare, armiqtë tanë shekullore kanë bërë gjithçka të zhdukin Dibrën, kanë dështuar dhe do dështojnë edhe tani”, u shpreh ai.
Sipas Berishës, me mençurinë që i karakterizon dibranët do “t’i japin ujë me bisht ë lugës dashakeqësit”, Edi Rama.
“Thirrja për dibranët ta doni Dibrën, sa e dua unë. Nëse e bëni s’guxon kurrë kush ta përmbyse Dibrën. Ngrihuni kudo që jeni, mblidhuni në të katër anët të votoni për Dibrën, për Ismail Ukën”, tha ish-kryeministri.
Edhe kandidati i koalicionit “Bashkë Fitojmë”, Ismail Uka e konsideroi 14 majin një referendum për dibranët, për shkak të rrezikut nga përmbytja prej hidrocentralit të Skavicës.
“Ne do të detyrojmë qeverinë të tërhiqet nga ndërtimi i projektit të Skavicës. Ne u kemi ofruar zgjidhje konkrete për problemet tuaja të pazgjidhura gjatë qeverisjes së Rilindjes. Tre janë sfidat e mia kryesore si kandidat për kryetar bashkie: keqqeverisja e bashkisë së Dibrës, shpopullimi dhe largimi i të rinjve jashtë vendit si dhe projekti i zhdukjes së Dibrës me anë të mbytjes së saj përmes ndërtimit të hidrocentralit të Skavicës. Këto tre sfida të përbashkëta unë si kandidat i opozitës kam ofruar zgjidhje konkrete. Kam propozuar decentralizim të kompetencave, krijimi i një modeli të ri të qeverisjes vendore duke e kthyer nga Bashkia e kryetarit te ajo e qytetarit, vënia në eficencë të administratës së bashkisë, punësimi i çdo të riu që ka përfunduar arsimin e lartë, mbështetjen e të rinjve për të kryer arsimin profesional”, tha Uka.
Më tej ai përsëriti një thirrje të bërë publikisht më parë për ballafaqim në debat me kandidatin e Partisë Socialiste në këto zgjedhje.
“Ju jeni dëshmitar që në çdo takim të zhvilluar, kam ftuar kandidatin e PS në këto zgjedhje që të vijë në ballafaqime publike, të parashtrojë secili prej nesh vizionin e tij që çdo qytetari ti jepet mundësia që përmes votës së tij të zgjedhë më të mirin. Kandidati i PS nuk është në gjendje të ballafaqohet dhe të japë llogari për 8 vitet e keqqeverisjes. 14 maji është referendum për dibranët”, deklaroi Uka.
