Qyteti i Korçës do të bëhet me stadium të ri, modern dhe multifunskional. Ditën e sotme u shpall projekti fitues, ai i studios daneze CEBRA, që projektoi një stadium të mbuluar me ndërtesa të vogla jashtë saj që do të shërbejnë për hotele, dyqane, lokale e jo vetëm.
Presidenti i FSHF, Armand Duka ka reaguar në rrejte sociale pas eventit.
“Si pjesëtar i një jurie profesionistësh, i uroj suksese kompanisë fituese të arkitekturës për Arenën e Korçës, kompanisë daneze Cebra, për idenë e këtij projekti, ndërthurjen e elementit sportiv me arkitekturën e qytetit.
Shpresoj në realizimin sa më të mirë të këtij projekti arkitekturor si një mundësi argëtimi dhe shkëlqimi jo vetëm për futbollistët amatorë e profesionistë në këtë qark, por si një gur i çmuar i gjithë kolonës së stadiumeve që po i japin më shumë gjallëri sportive futbollit shqiptar. Urime dhe falenderime për të tre studiot konkurrente dhe shumë urime studios Cebra në realizimin e këtij projekti”, shkruan Duka.
