Ish kryeministri Sali Berisha iu përgjigj sulmeve të kryeministrit Edi Rama i cili e quan atë dhe kreun e PL, zorrën qorre të Shqipërisë.
Nga Lushnja, Berisha tha se Rama përpiqet të largojë vëmendjen ndërkohë që bëri thirrje që qytetarët t’i tregojnë vendin në zgjedhjet e 14 Majit.
“Ai ka zgjedhur një mënyrë për fushatë. Asnjë ballafaqim me kandidatët rivalë. Ai vetë nuk pranon të ballafaqohet. Çdo politikan ka detyrim të ballafaqohet me rivalin. Pastaj të kërkojnë votën. Ky mashtrim dhe vetëm mashtrim. Del burri dy metra nga një shesh në një shesh tjetër me zorrë në gojë.
E bën këtë me qëllimin djallëzor që njerëzit të mos merren me faktin se ai udhëton me avion me dhomë gjumi. Shpenzon 22 mln euro vetëm udhëtime me avion taksi. Krijon një park makinash 5-6 mln eurosh sikur të ishte sheik. Përpiqet që të gjithë diskutimin qytetarët ta bëjnë për zorrën qorre.
U bëj thirrje ju që të angazhoheni me çdo qytetar dhe çdo socialist. Dhe t’i tregojmë vendin një mashtrimi të paimagjinueshëm. Këta nuk kanë besim tjetër. Para dhe mashtrim, mashtrim dhe para. Isha në Maliq, një kryetar bashkie 23 vite, tani thoshte do vendos trenin elektrik nga Maliqi te pylli i fazanëve”, u shpreh Berisha.
