Një femër është bërë “mollë” sherri për dy 37-vjeçarë shqiptarë në Larisa të Greqisë.
Mediat helene raportojnë se dy shqiptarët po pinin së bashku në kafenenë e një fshati në Elassona të Larisës, por dëshira e tyre t’u lidhur me të njëjtën grua bëri që miqësia të prishej.
Dy 37-vjeçarët kanë nisur të grinden dhe për pasojë një prej tyre ka nxjerrë thikën duke goditur shokun e tij.
Ngjarja e përgjakshme ka ndodhur mbrëmjen e së hënës, kur autori ka nxjerrë një thikë të vogël dhe ka plagosur në tre gishtat e dorës së majtë bashkëkombësin e tij, i cili u dërgua në spitalin e Larisës.
Pronarët e kafenesë kanë thirrur punonjësit e policisë së njësisë vendore të cilët kanë arrestuar 37-vjeçarin që agravoi konfliktin për një grua dhe kanë ngritur kallëzim ndaj tij për lëndim trupor dhe shkelje të ligjit për armët.
37-vjeçari është dërguar të martën në prokurorinë penale të Larisës.
Më pas ai është referuar në hetuesi, nga ku ka pranuar krimin dhe ka kërkuar falje, por pas gjykimit dhe vuajtjes së çdo dënimi të vendosur ndaj tij do të deportohet, pasi qëndronte në Greqi ilegalisht.
